धाराशिव: धाराशिव नगर परिषदेच्या निवडणुकीचा बिगुल वाजताच राजकीय वातावरणात आरोपांच्या तोफा धडाडू लागल्या आहेत. शहराच्या विकासाची नस असलेल्या तब्बल १४० कोटींच्या रस्त्यांच्या कामावरून आता पालकमंत्री प्रताप सरनाईक आणि खासदार ओमराजे निंबाळकर यांच्यात जोरदार ‘कलगीतुरा’ रंगला आहे. “विरोधकांच्या नाकावर टिचून कामं करणार,” असे ओपन चॅलेंजच सरनाईकांनी दिल्याने राजकीय वर्तुळात खळबळ उडाली आहे.
नेमकं प्रकरण काय?
धाराशिव शहरातील ५९ प्रमुख रस्त्यांसाठी मंजूर झालेला १४० कोटींचा निधी आणि त्यातून होणारी कामे गेल्या १८ महिन्यांपासून रेंगाळली आहेत. रस्ते कामाच्या या ‘स्पीड ब्रेकर’वरून ठाकरे गटाचे खासदार ओमराजे निंबाळकर आणि आमदार कैलास पाटील यांनी सत्ताधाऱ्यांना कोंडीत पकडले होते. “पालकमंत्री सरनाईक आणि भाजप आमदार राणा पाटील यांच्यातील अंतर्गत वादामुळेच शहराचा विकास खुंटला,” असा घणाघाती आरोप विरोधकांनी केला होता.
सरनाईकांचा ‘डॅशिंग’ अंदाज!
शिवसेना (शिंदे गट) पक्षाच्या २१ उमेदवारांच्या प्रचारसभेत बोलताना पालकमंत्री प्रताप सरनाईक यांनी विरोधकांचा चांगलाच समाचार घेतला. आपल्या खास शैलीत उत्तर देताना ते म्हणाले, “निवडणुकीचा निकाल ३ डिसेंबरला आहे. तुम्ही फक्त आपल्या २१ शिलेदारांना निवडून द्या, या रखडलेल्या कामांचं नारळ मी स्वतः फोडणार! आणि ज्यांनी या कामाला विरोध केलाय, त्यांच्या ‘नाकावर टिचून’ ही कामं सुरू करणार!”
ओमराजेंची ‘गुगली’
सरनाईकांच्या या वक्तव्यावर खासदार ओमराजे निंबाळकर यांना छेडले असता, त्यांनी आपल्या मिश्किल शैलीत उत्तर दिले. ते म्हणाले, “ते कुणाच्या नाकावर टिचून काम सुरू करणार आहेत, हे एकदा त्यांनाच विचारा!” ओमराजेंच्या या उत्तराने सरनाईकांचा रोख नक्की विरोधकांकडे होता की स्वकीयांकडे (राणा पाटलांकडे)? अशी खुमासदार चर्चा आता धाराशिवच्या कट्ट्याकट्ट्यावर सुरू झाली आहे.
रस्त्यांच्या कामावरून पेटलेलं हे राजकारण ३ डिसेंबरनंतर विकासाचा मार्ग मोकळा करणार की, श्रेयावादाच्या लढाईत धाराशिवकर पुन्हा खड्ड्यातच राहणार? हे पाहणं औत्सुक्याचं ठरणार आहे.
