धाराशिव : ऐन दिवाळीत येडशी येथे घडलेल्या भीषण अग्नितांडवाच्या पार्श्वभूमीवर आणि लोकप्रतिनिधींनी व्यक्त केलेल्या तीव्र संतापानंतर अखेर राज्य सरकारच्या नगर विकास विभागाला जाग आली आहे. ‘महाराष्ट्र अग्निसुरक्षा अभियान (जिल्हास्तर)’ अंतर्गत धाराशिव नगरपरिषदेसाठी ३ नवीन अग्निशमन वाहने खरेदी करण्यास शासनाने विशेष बाब म्हणून मान्यता दिली आहे. यासाठी ४ कोटी ५० लाख ९० हजार रुपये (४५०.९० लक्ष) इतक्या निधीला मंजुरी देण्यात आली असून, यासंदर्भातील अधिकृत आदेश १८ नोव्हेंबर २०२६ रोजी काढण्यात आले आहेत.
नेमकी पार्श्वभूमी काय?
नुकत्याच पार पडलेल्या दिवाळीच्या सणात येडशी येथील करंडे यांच्या दुकान आणि घराला भीषण आग लागली होती. या दुर्घटनेत भाजून आणि गुदमरून सात जणांचा दुर्दैवी मृत्यू झाला होता. त्यावेळी धाराशिव नगरपरिषदेकडे केवळ एकच अग्निशमन बंब उपलब्ध होता आणि दुर्दैवाने त्यामध्ये पुरेसे डिझेल व पाणीही नव्हते. तसेच, अग्निशमन दलाचे जवान प्रशिक्षित नसून त्यांच्याकडे आवश्यक सुरक्षा कीटही उपलब्ध नसल्याची धक्कादायक बाब समोर आली होती.
या भोंगळ कारभारावरून आणि निष्काळजीपणावरून आमदार कैलास पाटील आणि डॉ. प्रतापसिंह पाटील यांनी प्रशासनावर तीव्र संताप व्यक्त करत जाब विचारला होता. या घटनेनंतर धाराशिवच्या अग्निशमन यंत्रणेचे सक्षमीकरण करण्याची मागणी जोर धरू लागली होती.
शासनाच्या आदेशात काय म्हटले आहे?
जिल्हाधिकारी कार्यालय, धाराशिव (नगरपरिषद प्रशासन विभाग) यांच्याकडून जुलै २०२५ आणि एप्रिल २०२६ मध्ये पाठवण्यात आलेल्या प्रस्तावांवर नगर विकास विभागाने हा निर्णय घेतला आहे.
-
नगर विकास विभागाचे अवर सचिव डॉ. रविंद्र भराटे यांच्या स्वाक्षरीने धाराशिवच्या जिल्हाधिकाऱ्यांना याबाबतचे पत्र पाठवण्यात आले आहे.
-
चालू आर्थिक वर्षासाठी मंजूर निधीतून ४५०.९० लक्ष रुपयांच्या किंमतमर्यादेत ही तीन अत्याधुनिक अग्निशमन वाहने खरेदी केली जाणार आहेत.
-
ही खरेदी करताना १ जानेवारी २०११ च्या शासन निर्णयातील इतर विहित प्रयोजनांसाठी निधीची कमतरता भासणार नाही, याची दक्षता घेण्याच्या सूचनाही जिल्हाधिकाऱ्यांना देण्यात आल्या आहेत.
सात निष्पाप जीवांचा बळी गेल्यानंतर आणि लोकप्रतिनिधींच्या रेट्यानंतर का होईना, धाराशिवला आता तीन नवीन अग्निशमन वाहने मिळणार असल्याने आपत्कालीन यंत्रणा अधिक सक्षम होण्याची आशा व्यक्त केली जात आहे.
धाराशिव अग्निशमन वाहनांवरून ‘श्रेयवादाची लढाई’; खासदार ओमराजे विरुद्ध भाजप नगरसेवक राहुल काकडे आमनेसामने
धाराशिव नगरपरिषदेसाठी ४५०.९० लाख रुपयांच्या निधीतून ३ नवीन अग्निशमन वाहने खरेदी करण्यास शासनाने मान्यता दिल्यानंतर जिल्ह्यात राजकीय श्रेयवादाची लढाई सुरू झाली आहे. यावरून खासदार ओमराजे निंबाळकर आणि भाजप नगरसेवक राहुल काकडे (नगराध्यक्षा नेहा काकडे यांचे पती) यांच्यात जोरदार जुंपली आहे.
-
खासदारांचा दावा : उपमुख्यमंत्री तथा नगरविकास मंत्री एकनाथ शिंदे यांच्याकडे केलेल्या पत्रव्यवहाराच्या आणि पाठपुराव्याच्या यशामुळेच ही ३ अग्निशमन वाहने मंजूर झाल्याचा दावा खासदार ओमराजे निंबाळकर यांनी प्रसिद्धीपत्रकाद्वारे केला आहे.
-
राहुल काकडे यांचा पलटवार : या दाव्यावर राहुल काकडे यांनी जोरदार प्रहार करत ‘श्रेय घेण्याची घाई कशासाठी?’ असा सवाल केला आहे. हा निधी जिल्हा नियोजन समितीचा असून, १८ नोव्हेंबरच्या शासन आदेशात नगरपरिषदेच्या प्रस्तावाचाच स्पष्ट उल्लेख आहे, खासदारांच्या पत्राचा नाही, असे काकडे यांनी स्पष्ट केले. तसेच, येडशी दुर्घटनेनंतर आमदारांच्या पाठपुराव्यामुळे आणि मुख्यमंत्री देवेंद्र फडणवीस व उपमुख्यमंत्री एकनाथ शिंदे यांच्या निर्देशांमुळेच या कामाला गती मिळाल्याचे सांगत दुसऱ्यांच्या कामाचे श्रेय घेऊ नका, असा टोलाही त्यांनी लगावला आहे.




