धाराशिव: धाराशिव नगरपालिकेच्या निवडणुकीच्या रणधुमाळीत उमेदवारांनी दाखल केलेल्या शपथपत्रातून त्यांची आर्थिक कुंडली समोर आली आहे. या निवडणुकीत राष्ट्रवादी काँग्रेस (अजित पवार गट) आणि भाजपच्या उमेदवारांकडे कोट्यवधींची संपत्ती असल्याचे स्पष्ट झाले आहे, तर दुसरीकडे वंचित बहुजन आघाडीच्या उमेदवार अत्यंत सामान्य परिस्थितीतून निवडणूक लढवत आहेत.
निवडणूक आयोगाकडे सादर केलेल्या शपथपत्रांनुसार, राष्ट्रवादीच्या (अजित पवार गट) उमेदवार ॲड. मंजुषा साखरे या रिंगणातील सर्वात श्रीमंत उमेदवार ठरल्या आहेत, तर वंचित बहुजन आघाडीच्या सुरेखा वाघमारे यांच्याकडे सर्वात कमी संपत्ती आहे.
उमेदवारांच्या संपत्तीचे विश्लेषण खालीलप्रमाणे:
१. ॲड. मंजुषा साखरे (राष्ट्रवादी काँग्रेस – अजित पवार गट):
शहरातील सहा प्रमुख महिला उमेदवारांमध्ये ॲड. साखरे यांची संपत्ती सर्वाधिक आहे. त्यांच्या कुटुंबाची एकूण संपत्ती २ कोटी २७ लाख ९७ हजार ३६५ रुपये इतकी आहे.
-
उत्पन्न: साखरे यांचे स्वतःचे वार्षिक उत्पन्न २.४० लाख तर पतीचे १२.४२ लाख रुपये आहे.
-
वाहन: त्यांच्याकडे ५० लाख ६८ हजार रुपयांची चारचाकी गाडी आहे.
-
बँक ठेवी: पतीच्या नावे तब्बल ८६ लाखांच्या ठेवी असून, ॲड. साखरे यांच्या नावे २ लाखांच्या ठेवी आहेत.
-
स्थावर मालमत्ता: पती-पत्नी दोघांच्याही नावे पुण्यात प्रत्येकी एक सदनिका आहे.
२. नेहा काकडे (भाजप):
भाजपच्या उमेदवार नेहा काकडे यांच्याकडे सोन्याचे सर्वाधिक दागिने आहेत.
-
दागिने: नेहा काकडे यांच्याकडे स्वतःकडे १८ लाखांचे तर पतीकडे १२ लाखांचे असे मोठ्या प्रमाणावर सोन्याचे दागिने आहेत.
-
वाहने: पतीच्या नावे ३३ लाख रुपयांची वाहने आहेत.
-
कर्ज: कुटुंबावर १२ लाख रुपयांचे बँकेचे देणे आहे.
-
उत्पन्न: काकडे आणि त्यांचे पती दोघेही स्वतंत्र व्यवसाय करतात. त्यांच्या कुटुंबाचे वार्षिक उत्पन्न १३ लाख ६५ हजार रुपये आहे.
३. सुरेखा वाघमारे (वंचित बहुजन आघाडी):
‘वंचित’च्या उमेदवार सुरेखा वाघमारे यांची आर्थिक स्थिती इतर उमेदवारांच्या तुलनेत अत्यंत तोकडी आहे. त्या घरकाम करतात.
-
रोख रक्कम: स्वतःकडे ५ हजार तर पतीकडे २ हजार रुपये रोख आहेत.
-
संपत्ती: त्यांच्याकडे १ लाख २० हजारांचे दागिने आहेत. कुटुंबाची एकूण जंगम मालमत्ता १ लाख ३५ हजार २९१ रुपये असून, त्यांच्याकडे कोणतीही स्थावर मालमत्ता (जमीन/घर) नाही.
४. संगीता गुरव (शिवसेना – ठाकरे गट):
-
संगीता गुरव यांचे स्वतःचे उत्पन्न नसून पतीचे वार्षिक उत्पन्न साडेतीन लाख रुपये आहे.
-
त्यांच्या कुटुंबाकडे चारचाकी असून, दोघांच्या नावे लाखांच्या ठेवी आहेत.
-
एकूण मालमत्ता ६४ लाख रुपयांची असून, त्यांच्यावर १२ लाख ६३ हजार रुपयांचे कर्ज आहे.
५. परविन कुरेशी (राष्ट्रवादी काँग्रेस – शरद पवार गट):
-
परविन कुरेशी यांचे स्वतःचे उत्पन्न नसून पतीचे उत्पन्न ५ ते ६ लाखांच्या घरात आहे.
-
स्वतःकडे २ लाख ४८ हजारांचे दागिने आहेत. कुटुंबाची एकूण मालमत्ता २४ लाख रुपयांची आहे.
६. नाझिया मोमीन (एमआयएम):
-
यांच्या पतीचे वार्षिक उत्पन्न शपथपत्रात नमूद नाही.
-
कुटुंबाकडे ८४ हजारांचे दागिने आहेत.
-
विशेष म्हणजे कुटुंबाचे वार्षिक उत्पन्न ४० हजार रुपये असताना, त्यांच्या कुटुंबावर २८ लाख ६१ हजार रुपयांचे बँकेचे देणे आहे.
या शपथपत्रांवरून स्पष्ट होते की, काही उमेदवारांच्या कुटुंबात आलिशान गाड्या आणि पुण्यात फ्लॅट्स आहेत, तर काहींचा उदरनिर्वाह कष्टाच्या कामावर अवलंबून आहे. या आर्थिक विषमतेत जनता कोणाच्या पारड्यात मत टाकणार, हे पाहणे औत्सुक्याचे ठरेल.
