धाराशिव – धाराशिव नगर पालिकेतील २७ कोटीच्या कथित घोटाळा प्रकरणी विशेष तपास पथक ( एसआयटी ) नेमणूक करण्यात आले असून डीवायएसपी स्वप्नील राठोड यांना मदत करण्यासाठी दोन सहाय्यक पोलीस निरीक्षक नियुक्त करण्यात आले आहेत. हा आदेश पोलीस अधीक्षक अतुल कुलकर्णी यांनी आज ( गुरुवारी ) काढला आहे.
धाराशिव नगर पालिकेतील २७ कोटीच्या कथित घोटाळा प्रकरणी आनंदनगर पोलीस स्टेशनमध्ये १४ ऑगस्ट २०२३ रोजी गुन्हा दाखल करण्यात आला आहे. या गुन्ह्यातील तपासात पोलीस निरीक्षक प्रवीणकुमार बांगर यांनी जाणीवपूर्वक दिरंगाई केल्याने या प्रकरणाचा तपास डीवायएसपी स्वप्नील राठोड यांच्याकडे सोपवण्यात आला आहे. आता यासाठी विशेष तपास पथक ( एसआयटी ) नेमणूक करण्यात आले असून डीवायएसपी स्वप्नील राठोड यांना मदत करण्यासाठी सहाय्यक पोलीस निरीक्षक वैभव नेटके आणि सहाय्यक पोलीस निरीक्षक खरड यांची नियुक्ती करण्यात आली आहे.
धाराशिव नगर पालिकेतील कथित २७ कोटींच्या गैरव्यवहार प्रकरणी तत्कालीन निलंबित मुख्याधिकारी हरिकल्याण जनार्धन येलगट्टे यांच्यासह तीन जणांवर आनंदनगर पोलीस स्टेशनमध्ये १४ ऑगस्ट रोजी गुन्हा दाखल करण्यात आला आहे. याप्रकरणी येलगट्टे यांना पोलिसांनी अटक केली असली तरी बोर्डे आणि पवार हे तीन महिन्यापासून मोकाट आहेत.
धाराशिव नगर पालिकेतील कथित २७ कोटीच्या गैरव्यवहार प्रकरणी दोन आरोपीना अटक करण्यात आनंदनगर पोलीस स्टेशनचे पोलीस निरीक्षक प्रवीणकुमार बांगर निष्क्रिय ठरले होते. धाराशिव लाइव्हच्या दणक्यानंतर हा प्रकरणाचा तपास बांगर यांच्याकडून काढून डीवायएसपी स्वप्नील राठोड यांच्याकडे सोपवण्यात आला आहे.आरोपी आणि पोलीस यांच्यात ‘अर्थपूर्ण’ बोलणी झाल्याने आनंदनगर पोलीस आरोपीना अटक करण्याचे धाडस करीत नव्हते. याप्रकरणी बांगर यांची पोलीस मुख्यालयात लवकरच उचलबांगडी होणार आहे.
धाराशिव नगर पालिकेतील २७ कोटीच्या कथित घोटाळा प्रकरणी आ. सुरेश धस यांनी विधान परिषदेत तारांकित प्रश्न उपस्थित केला असून, तपासात दिरंगाई केल्याप्रकरणी काही प्रश्न विचारले आहेत. यामुळे निष्क्रिय पोलीस निरीक्षक प्रवीणकुमार बांगर यांची पाचावर धारण बसली आहे.
काय आहे प्रकरण ?
आरोपी नामे- हरिकल्याण जनार्धन येलगट्टे, तत्कालीन मुख्याधिकारी, नगर परिषद उस्मानाबाद 2) सुरज संपत बोर्डे तत्कालीन लेखापाल, 3) प्रशांत विक्रम पवार तत्कालीन अंतर्गत लेखापरिक्षक सर्व रा. उस्मानाबाद यांनी दि.06.07.2020 ते दि.21.11.2022 पावेतो नगर परिषद उस्मानाबाद येथे एकुण 1088 प्रमाणके शासकीय अभिलेख आहे. हे माहित असताना व ते लेखाविभागात जतन करुन ठेवणे बंधनकारक असताना ती ठेवली नाहीत आणिक विविध विकास योजना व इतर आनुषंगीक खर्चाबाबतचे एकुण 514 प्रमाणके ज्याची एकुण 27,38,78,100 ₹ रक्कमेचा अपहार करुन तो दडपण्याच्या उद्देशाने प्रमाणके जाणिवपुर्वक लेखाविभागात ठेवले नाहीत अशा मजकुराच्या फिर्यादी नामे- अशोक कलेश्वर फरताडे, वय 31 वर्षे, धंदा लेखापाल नगर परिषद उस्मानाबाद रा.मस्सा खंडेश्वरी ता. कळंब जि. उसृमानाबाद हा.मु. समर्थ नगर उस्मानाबाद ता. जि. उस्मानाबाद यांनी दि.14.08.2023 रोजी सरकारतर्फे दिलेल्या प्रथम खबरेवरुन आनंदनगर पो ठाणे येथे भा. दं. वि. सं. कलम- 420, 409, 34, 201 सह महाराष्ट्र सार्वजनिक अभिलेख अधि कलम 9 अन्वये गुन्हा नोंदवला आहे.
