धाराशिव: धाराशिव नगरपरिषद निवडणुकीच्या पार्श्वभूमीवर राजकीय वातावरण तापू लागले आहे. एकीकडे आमदार राणाजगजितसिंह पाटील यांच्या हस्ते भारतीय जनता पक्षाचा ‘वचननामा’ प्रसिद्ध करण्यात आला असतानाच, दुसरीकडे शिवसेना (ठाकरे गट) जिल्हा प्रवक्ते तानाजी जाधवर यांनी यावर जोरदार टीकास्त्र सोडले आहे. जाधवर यांनी या वचननाम्याची संभावना ‘स्थगिती नामा’ अशी केल्याने राजकीय वर्तुळात चर्चांना उधाण आले आहे.
आगामी नगरपरिषद निवडणुकीच्या अनुषंगाने भाजपच्या वतीने शहराच्या विकासाचा रोडमॅप सांगणारा वचननामा तयार करण्यात आला आहे. आमदार राणाजगजितसिंह पाटील आणि इतर प्रमुख पदाधिकाऱ्यांच्या उपस्थितीत या वचननाम्याचे काल प्रकाशन करण्यात आले. यावेळी भाजपकडून विविध विकासकामांचे दावे करण्यात आले आहेत.
मात्र, हा वचननामा प्रसिद्ध होताच विरोधकांनी भाजपला लक्ष्य केले आहे. शिवसेना (उद्धव बाळासाहेब ठाकरे) पक्षाचे जिल्हा प्रवक्ते तानाजी जाधवर यांनी सोशल मीडियावर एक पोस्ट करत भाजपच्या या दाव्यांची खिल्ली उडवली आहे.
तानाजी जाधवर यांची टीका:
जाधवर यांनी आपल्या पोस्टमध्ये म्हटले आहे की, “भाजपचा ‘स्थगिती’ नामा प्रसिद्ध झाला म्हणे!” महायुती सरकारच्या काळात अनेक विकासकामांना दिलेल्या स्थगितीच्या पार्श्वभूमीवर जाधवर यांनी हा टोला लगावला असल्याचे बोलले जात आहे. भाजपच्या आश्वासनांवर विश्वास न ठेवता त्यांनी याला थेट ‘स्थगिती नामा’ संबोधल्याने आता भाजप या टीकेला काय प्रत्युत्तर देणार, याकडे सर्वांचे लक्ष लागले आहे.
