धाराशिव – धाराशिव जिल्ह्यात जुन्या वादातून हाणामारीचा प्रकार उघडकीस आला आहे. शालीमार कॉलनी शिंगोली येथील चार आरोपींनी एका व्यक्तीस लाथाबुक्यांनी आणि लोखंडी रॉडने मारहाण करून गंभीर जखमी केले. आरोपींविरुद्ध आनंदनगर पोलीस ठाण्यात गुन्हा दाखल करण्यात आला आहे.
घटनेबाबत अधिक माहिती अशी की, आरोपी अनिकेत पाशुमिया शेख, पाशुमिया बाबुलाल शेख, आझाद पाशुमिया शेख (सर्व राहणार शालीमार कॉलनी शिंगोली) आणि रमेश पवार (राहणार सेवालाल कॉलनी धाराशिव) यांनी दि. 16 मार्च 2025 रोजी रात्री 9.30 वाजता पुलाजवळील शिंगोली रोड येथे अफजल इसुफ शेख (वय 40 वर्षे, राहणार शालीमार कॉलनी धाराशिव) यांच्यावर जुने भांडण कारणावरून हल्ला केला.
आरोपींनी अफजल शेख यांना शिवीगाळ करून लाथाबुक्यांनी मारहाण केली तसेच लोखंडी रॉडने हल्ला करून गंभीर जखमी केले. यावेळी त्यांनी जिवे ठार मारण्याची धमकीही दिली. जखमी अवस्थेत अफजल शेख यांनी दि. 19 मार्च 2025 रोजी आनंदनगर पोलीस ठाण्यात फिर्याद दिली.
अफजल शेख यांच्या तक्रारीवरून आनंदनगर पोलीस ठाण्यात आरोपींविरुद्ध भारतीय दंड संहिता कलम 118(1), 115(2), 352, 351(2)(3), 3(5) अन्वये गुन्हा नोंदवण्यात आला आहे.सदर प्रकरणाचा पुढील तपास पोलीस निरीक्षकांच्या मार्गदर्शनाखाली आनंदनगर पोलीस ठाणे करीत आहे.
सुपारीच्या वादातून मारहाण; कोथळीत आरोपीविरुद्ध गुन्हा दाखल
उमरगा – सुपारी उधार देण्याच्या वादातून कोथळी येथे एका व्यक्तीस मारहाण केल्याची घटना उघडकीस आली आहे. आरोपी नितीन उमराव कांबळे (रा. कोथळी, ता. उमरगा, जि. धाराशिव) याने फिर्यादी श्रीशैल्य नेमिनाथ गुरव (वय 45 वर्षे, रा. कोथळी, ता. उमरगा, जि. धाराशिव) यांना दगडाने आणि लाथाबुक्यांनी मारहाण करत जखमी केले.
ही घटना दि. 19 मार्च 2025 रोजी सायंकाळी 5.30 वाजता बसवेश्वर मंदिराजवळील पानटपरीसमोर घडली. सुपारी उधार देण्याच्या कारणावरून वाद वाढत गेला आणि आरोपी नितीन कांबळे याने श्रीशैल्य गुरव यांना शिवीगाळ करत लाथाबुक्यांनी आणि दगडाने मारहाण केली. यावेळी आरोपीने जिवे ठार मारण्याची धमकीही दिली.
जखमी झालेल्या श्रीशैल्य गुरव यांनी तातडीने मुरुम पोलीस ठाण्यात धाव घेतली आणि घटनेची माहिती दिली. त्यांच्या तक्रारीवरून मुरुम पोलीस ठाण्यात भारतीय दंड संहिता कलम 118(1), 115(2), 352, 351(2)(3) अन्वये गुन्हा नोंदवला आहे. सदर प्रकरणाचा पुढील तपास मुरुम पोलीस ठाण्याचे पोलीस निरीक्षक यांच्या मार्गदर्शनाखाली सुरू आहे.
