धाराशिव: येथील मध्यवर्ती प्रशासकीय इमारतीमधील सहाय्यक संचालक, स्थानिक निधी लेखा परीक्षण कार्यालयात काम करणाऱ्या एका शिपायाने कार्यालयातच गळफास घेऊन आत्महत्या केल्याची धक्कादायक घटना घडली आहे. ही घटना बुधवारी सकाळी उघडकीस आली असून, यामुळे प्रशासकीय वर्तुळात मोठी खळबळ उडाली आहे.
नक्कियोद्दीन बशीरोद्दीन काझी (वय ४८, रा. खाजानगर, धाराशिव) असे आत्महत्या केलेल्या शिपायाचे नाव आहे. मिळालेल्या माहितीनुसार, काझी हे गेल्या काही दिवसांपासून मानसिक तणावाखाली होते. मात्र, त्यांच्या या तणावामागील नेमके कारण अद्याप स्पष्ट झालेले नाही. विशेष म्हणजे, काझी हे रात्रीच्या वेळी कार्यालयातच मुक्काम करत असत.
घटनेची माहिती मिळताच आनंदनगर पोलीस तातडीने घटनास्थळी दाखल झाले आहेत. पोलिसांनी मृतदेह ताब्यात घेतला असून, पंचनामा करण्याचे काम सुरू आहे. काझी यांनी हे टोकाचे पाऊल का उचलले, याचा अधिक तपास पोलीस करत आहेत. या घटनेमुळे परिसरात हळहळ व्यक्त होत आहे.
हे आहेत प्रश्न ?
- स्थानिक निधी लेखा परीक्षण कार्यालय असूनही सुरक्षा गार्ड कसा काय नियुक्त नाही ?
- मयत शिपाई नक्कियोद्दीन बशीरोद्दीन काझी ऑफिसमध्ये नेमका कश्यासाठी मुक्कामास होता ?
