धाराशिव: शहरातील रस्त्यांची अत्यंत दयनीय अवस्था आणि रखडलेल्या कामांमुळे संतप्त झालेल्या धाराशिवकरांनी मंगळवारी (दि. 7) नगर परिषद प्रशासनाविरोधात आंदोलन केले. या आंदोलनामुळे नरमलेल्या प्रशासनाने तब्बल नऊ महिने रखडलेल्या निविदा प्रक्रियेला गती देण्याचे व फेब्रुवारीअखेर रस्त्यांची कामे सुरू करण्याचे लेखी आश्वासन दिले. यामुळे धाराशिवकरांचे आंदोलन यशस्वी ठरले आहे.
रस्त्यांची दुरवस्था आणि नागरिकांचा संताप
धाराशिवमधील रस्त्यांवर खड्ड्यांचे साम्राज्य आहे. या खड्ड्यांमुळे अपघातांचे प्रमाण वाढले असून काहींना जीव गमवावा लागला आहे. रस्त्यांच्या दुरुस्तीच्या प्रतीक्षेत शहरवासीयांनी अनेक वेळा प्रशासनाकडे पाठपुरावा केला. परंतु कामे सुरू होत नसल्याने नागरिकांनी थेट आंदोलनाचा मार्ग स्विकारला.
नगरोत्थान योजनेंतर्गत मंजूर निधी अद्यापही वापरात नाही
नगरोत्थान महाअभियान अंतर्गत धाराशिव नगर परिषदेला 140 कोटी रुपयांच्या रस्त्यांच्या कामांसाठी मंजुरी मिळाली होती. यामध्ये सात दिवसांत निविदा प्रक्रिया पूर्ण करून तीन महिन्यांत कामांना सुरुवात करणे अपेक्षित होते. मात्र, तब्बल नऊ महिने उलटूनही निविदा प्रक्रिया रखडली.
“मुख्याधिकाऱ्यांची नार्को टेस्ट घ्या” – धाराशिवकरांची मागणी
शहरातील नेत्यांच्या जाहिरातबाजीच्या पार्श्वभूमीवर प्रत्यक्ष कामे कोणी रोखली, हे समजण्यासाठी नागरिकांनी मुख्याधिकारी यांची नार्को टेस्ट करण्याची मागणी केली होती. तसेच, निविदा प्रक्रिया विलंबाबाबत चौकशी समिती नेमून जबाबदार अधिकाऱ्यांवर कारवाई करण्याचा आग्रह धरला.
आंदोलनाचे यश
रस्ता रोको आंदोलनामुळे शहरातील वाहतूक ठप्प झाली होती. आंदोलनाची तीव्रता पाहून नगर परिषद प्रशासनाला झुकावे लागले. प्रशासनाने आठ दिवसांत निविदा प्रक्रिया पूर्ण करून 28 फेब्रुवारीपर्यंत कामांना सुरुवात करण्याचे लेखी आश्वासन दिले. त्यामुळे संतप्त नागरिकांनी आंदोलन मागे घेतले.
धाराशिवकरांच्या या लढ्यामुळे प्रशासनाला जाग आली असून, लवकरच रस्त्यांच्या दुरुस्तीची प्रतीक्षा संपणार असल्याची अपेक्षा आहे.
