धाराशिव: शहरातील अभिनव इंग्लिश स्कूलमध्ये शिक्षण घेत असलेल्या विद्यार्थिनीला फी भरण्यास उशीर झाल्याने अपमानास्पद वागणूक देऊन शाळेतून घरी पाठवल्याप्रकरणी पालकाने केलेल्या तक्रारीची शिक्षण विभागाने गंभीर दखल घेतली आहे. शिक्षणाधिकारी (प्राथमिक) अशोक पाटील यांनी या प्रकरणाच्या चौकशीसाठी तीन सदस्यीय समिती गठीत केली असून, समितीला तातडीने चौकशी करून अहवाल सादर करण्याचे आदेश दिले आहेत.धाराशिव लाइव्हने याबाबत बातमी प्रकाशित केली होती.
अर्जदार सचिन हरिश्चंद्र मोरे यांनी १७ जून २०२५ रोजी शिक्षण विभागाकडे लेखी तक्रार दाखल केली होती. त्यांची मुलगी वेदिका सचिन मोरे, अभिनव इंग्लिश स्कूलमध्ये इयत्ता पाचवीच्या वर्गात शिकत आहे. शाळेची फी भरण्यास विलंब झाल्याने शाळा व्यवस्थापनाने श्री. मोरे यांना त्यांच्या भ्रमणध्वनी क्रमांकावर संपर्क साधून फी भरण्याची सूचना दिली होती. त्यावेळी त्यांनी १८ जून २०२५ रोजी फी भरण्याचे आश्वासन दिले होते.
असे असतानाही, त्यांची मुलगी वेदिका हिला अपमानास्पद वागणूक देऊन वर्गाच्या बाहेर काढण्यात आले आणि तिला घरी घेऊन जाण्यास सांगण्यात आले, असे मोरे यांनी आपल्या तक्रारीत म्हटले आहे. शासनाच्या निर्देशानुसार कोणत्याही विद्यार्थ्याला अशा प्रकारे अपमानास्पद वागणूक देता येत नाही, असे असतानाही शाळेने असे कृत्य केल्याचे तक्रारीत नमूद करण्यात आले आहे.
या तक्रारीची दखल घेत शिक्षण विभागाने तातडीने कारवाई केली आहे. शिक्षणाधिकारी (प्राथमिक) अशोक पाटील यांनी उपशिक्षणाधिकारी के. आर. पिकवणे यांच्या अध्यक्षतेखाली तीन सदस्यीय चौकशी समिती स्थापन केली आहे. या समितीत विस्तार अधिकारी दत्तप्रसाद जंगम आणि विस्तार अधिकारी सविता कुंभार यांचा सदस्य म्हणून समावेश आहे.
सदर समितीला १८ जून २०२५ रोजी सकाळी १० वाजता शाळेला प्रत्यक्ष भेट देऊन प्रकरणाची चौकशी करून वस्तुनिष्ठ अहवाल सादर करण्याचे निर्देश देण्यात आले आहेत. या चौकशी अहवालानंतर पुढील योग्य ती कार्यवाही केली जाणार असल्याचे शिक्षण विभागाने स्पष्ट केले आहे. या प्रकरणाच्या प्रती माहितीस्तव जिल्हा परिषदेचे मुख्य कार्यकारी अधिकारी आणि लातूरचे विभागीय शिक्षण उपसंचालक यांनाही पाठवण्यात आल्या आहेत.
धाराशिव : अभिनव इंग्लिश स्कूलमध्ये फीसाठी विद्यार्थिनीचा अपमान; पालकाची शिक्षण अधिकाऱ्यांकडे धाव
