धाराशिव: येथील सामाजिक वनीकरण विभागाच्या कारभारावर प्रश्नचिन्ह निर्माण करणारी एक गंभीर बाब समोर आली आहे. विभागाच्या हजेरी नोंदवहीमध्ये (मस्टर) चक्क भविष्यातील तारखांच्या सह्या आधीच केल्याचे आढळून आले आहे. शासकीय कामकाजात अत्यंत महत्त्वाच्या मानल्या जाणाऱ्या हजेरी नोंदवहीत अशी अनियमितता आढळल्याने प्रशासकीय वर्तुळात खळबळ उडाली आहे.
मिळालेल्या माहितीनुसार, सामाजिक वनीकरण विभागाच्या कार्यालयात एका कर्मचाऱ्याच्या उपस्थितीत हजेरी पट पाहण्याची विनंती करण्यात आली होती. यावेळी हजेरी नोंदवही तपासली असता, त्यात धक्कादायक प्रकार दिसून आला. दोन दिवसांपूर्वीच आगामी दिवसांच्या (भविष्यातील तारखांच्या) उपस्थितीच्या रकान्यात कर्मचाऱ्यांच्या सह्या आधीच करून ठेवल्या होत्या.
शासकीय नियमांनुसार, कर्मचाऱ्याने कार्यालयात प्रत्यक्ष उपस्थित राहूनच हजेरी नोंदवणे बंधनकारक असते. मात्र, येथे नियम धाब्यावर बसवून ॲडव्हान्समध्ये हजेरी लावली जात असल्याचे समोर आले आहे.
सामाजिक वनीकरण विभागाचे कार्यक्षेत्र मोठे असून अनेक कर्मचारी क्षेत्र भेटीवर किंवा विविध कामांवर असतात. मात्र, कार्यालयातील हजेरी नोंदवहीत भविष्यातील तारखांच्या सह्या आढळल्याने विभागाच्या नियंत्रण यंत्रणेवर आणि कामकाजाच्या पारदर्शकतेवर मोठे प्रश्नचिन्ह निर्माण झाले आहे. हा प्रकार केवळ नियमबाह्यच नसून शासकीय सेवेच्या शिस्तीचा भंग करणारा आहे.
हा प्रकार अत्यंत गंभीर असून यामागे कोण आहे, याचा शोध घेणे गरजेचे आहे. या प्रकरणाची वरिष्ठ पातळीवरून तातडीने चौकशी करून संबंधित दोषी कर्मचाऱ्यांवर ‘महाराष्ट्र सिव्हिल सर्व्हिस आचारसंहिता’ तसेच भारतीय दंड संहितेच्या (IPC) लागू कलमांनुसार कठोर कारवाई करावी, अशी मागणी सुज्ञ नागरिकांकडून केली जात आहे.
