उमरगा: उमरगा नगर परिषद निवडणुकीच्या पार्श्वभूमीवर शहरात राजकीय वातावरण चांगलेच तापले आहे. नुकतेच शिवसेना (शिंदे गट), भारतीय राष्ट्रीय काँग्रेस आणि इतर सामाजिक संघटनांनी एकत्र येत स्थापन केलेल्या ‘शहर विकास आघाडी’ने पत्रकार परिषद घेऊन विकासाचे ‘व्हिजन’ मांडले. मात्र, या व्हिजनवर प्रश्नचिन्ह उपस्थित करत ऍड. शीतल श्यामराव चव्हाण यांनी आघाडीला १० खोचक आणि थेट प्रश्न विचारून अडचणीत आणले आहे. शहरात चालणारा ‘गुडगुडी’ जुगार, गुत्तेदारी आणि ‘रातोरात’ झालेली युती यावर त्यांनी सडेतोड जाब विचारला आहे.
विकासाच्या बुरख्याआड काळी बाजू?
शहर विकास आघाडीने मांडलेले विकासाचे स्वप्न हे केवळ जनतेची दिशाभूल करण्यासाठी आणि आपली प्रतिमा उंचावण्यासाठी असल्याचा आरोप ऍड. चव्हाण यांनी केला आहे. त्यांनी म्हटले आहे की, याआधीच्या काळात शहरात झालेले अवैध धंदे, ठराविक लोकांचे झालेले आर्थिक लाभ आणि गुंडगिरीला मिळालेले पाठबळ यामुळे आघाडीची बदनामी झाली आहे. आता विकासाचे लोभसवाणे चित्र उभे करून जुन्या पाप झाकण्याचा हा प्रयत्न आहे.
ऍड. चव्हाण यांनी उपस्थित केलेले प्रमुख मुद्दे:
१. अवैध धंदे आणि ‘गुडगुडी’: शहरात अनेक वर्षे ‘गुडगुडी’ नावाचा जुगार सुरु होता, ज्यामुळे अनेक कुटुंब उद्ध्वस्त झाली. हा जुगार आणि पत्त्यांचे मोठे क्लब्स नक्की कोण चालवत होते आणि त्याचा आर्थिक मलाई कुणी खाल्ली? असा सवाल त्यांनी केला आहे.
२. गुत्तेदारी आणि नातेवाईक: नगर विकास खात्याकडून आलेल्या भरमसाठ निधीतून झालेली विकास कामे नक्की कुणाला मिळाली? आघाडीच्या नेत्यांच्या जवळच्या नातेवाईकांना किंवा कुटुंबातील व्यक्तींना सत्तेचा वापर करून गुत्ते देण्यात आले का? तसेच या कामांसाठीचे मटेरिअल ठराविक ठिकाणांवरूनच का मागवले गेले? असे प्रश्न त्यांनी उपस्थित केले आहेत.
३. अनैसर्गिक युती: भारतीय राष्ट्रीय काँग्रेसने शिवसेना (शिंदे गट) सोबत केलेली युती ही ‘विकासा’साठी नसून सत्तेसाठी रातोरात घेतलेला एकतर्फी निर्णय आहे, असा आरोप चव्हाण यांनी केला आहे. ज्यांना सोबत घेऊन निवडणूक लढवायचे ठरले होते, त्यांना विचारात न घेता हा निर्णय का घेतला गेला?
४. गुन्हेगारी पार्श्वभूमी: शहर विकास आघाडीतील उमेदवार हे टक्केवारी, हप्तेवसुली, रेशन चोरी आणि अवैध धंद्यांशी संबंधित नाहीत का? याची स्पष्टता आघाडीने करावी, असे आव्हान त्यांनी दिले आहे.
माजी आमदारांनी उत्तर टाळले?
यापूर्वी विकास निधीच्या विनियोगाबाबत आपण माजी आमदारांना पत्र लिहून माहिती मागवली होती, परंतु आजतगायत त्यांनी त्या पत्राला उत्तर दिले नसल्याची खंतही ऍड. चव्हाण यांनी व्यक्त केली आहे.
“तुम्ही माझ्यापेक्षा ज्येष्ठ आणि अनुभवी आहात, त्यामुळे माझ्या प्रश्नांची उत्तरे द्यावीत,” असा टोला लगावत ऍड. शीतल चव्हाण यांनी शहर विकास आघाडीच्या नेत्यांना कोंडीत पकडण्याचा प्रयत्न केला आहे. आता या प्रश्नांवर शहर विकास आघाडी काय उत्तर देणार, याकडे उमरगावासीयांचे लक्ष लागले आहे.
