धाराशिवच्या तहसीलदार श्रीमती मृणाल जाधव यांच्याविरुद्ध भ्रष्टाचाराचे आरोप, चौकशी सुरू

धाराशिवच्या तहसीलदार श्रीमती मृणाल जाधव यांच्याविरुद्ध भ्रष्टाचाराचे गंभीर आरोप झाले आहेत. त्यांच्याविरुद्ध विविध तक्रारी प्राप्त झाल्यानंतर उपविभागीय अधिकारी कार्यालयाने चौकशी सुरू केली आहे.

तक्रार क्रमांक १

श्री. अमोल शिवाजी जाधव यांनी केलेल्या तक्रारीनुसार:

• श्रीमती जाधव यांनी शेतकऱ्यांना मिळणाऱ्या अनुदानातून हप्ता घेतल्याचा आरोप आहे.
• शेत रस्त्यांच्या प्रकरणातही त्यांनी पैसे मागितल्याचा आरोप आहे. ज्यांनी पैसे दिले त्यांचेच रस्ते ताबडतोब मोकळे करून दिले जातात.
• त्यांनी अनेक अनाधिकृत अकृषक परवाने दिले आहेत.
• त्यांचे नातेवाईक असलेली दोन माणसे कलेक्शनला ठेवली आहेत.
• ज्या जमिनीच्या प्रकरणात पैसे मिळत नाहीत ती फाईल दाबून ठेवली जाते आणि ज्यामध्ये पैसे मिळाले ती फाईल ताबडतोब मंजूर केली जाते.

तक्रार क्रमांक 2

श्री. अमोल शिवाजी जाधव यांनी केलेल्या दुसऱ्या तक्रारीनुसार:

• धाराशिव तालुक्यात व शहरात एन.ए. ले-आऊट, ग्रीन झोन व खुली जागा तसेच अॅमिनीटी झोन कृषि व अकृषी व इतर सर्व जागेचे गोपनीय चौकशी करावी.
• दोषी आढळून आलेल्या अधिकाऱ्यांवर तात्काळ फौजदारी गुन्हे दाखल करण्याचे आदेश द्यावेत.

तक्रार क्रमांक 3

कार्यकारी अभियंता, महाराष्ट्र राज्य विद्युत वितरण कंपनी मर्या. यांच्या तक्रारीनुसार:

• श्रीमती जाधव यांनी ले-आऊट मंजूर करण्यापूर्वी नाहरकत घेतलेली नाही.
• त्यामुळे उच्च दाब वाहिनीखाली ले-आऊट झाल्यामुळे जीवितहानी होण्याची शक्यता आहे.

चौकशी अहवालातील निष्कर्ष

चौकशी अहवालात श्रीमती जाधव यांनी पुढीलप्रमाणे गैरकृत्ये केल्याचे म्हटले आहे:

• अधिकार नसलेल्या गावांमध्ये ले-आऊट मंजूर केले.
• ग्रीन झोनमध्ये ले-आऊट मंजूर केले.
• ले-आऊट मंजूर करताना नियमांचे पालन केले नाही.
• १० टक्के ओपन स्पेस आणि १० टक्के अॅमिनीटी स्पेस सोडला नाही.
• संबंधित कार्यालयाचे नाहरकत प्रमाणपत्र घेतले नाही.
• अकृषीच्या कोणत्याही संचिकेवर नायब तहसीलदार यांची स्वाक्षरी नाही.
• गौण खनिज विभागाच्या संचिकेत कार्यकारी अभियंता यांनी १००० ब्रास मुरुम उत्खननाची परवानगी मागितली असता, तहसीलदार यांनी त्यांच्या स्तरावर ५०० ब्रास उत्खननाची परवानगी दिली. उर्वरित ५०० ब्रास हे विनापरवाना उत्खनन झाले.
• लेखा विभागाचे कॅशबुक तपासले असता मागील सहा महिन्यांपासून कॅशबुकवर तहसीलदार यांनी स्वाक्षरी केल्याचे दिसून येत नाही.
• वर्ग-२ चा सातबारा एडिट करून वर्ग-१ करून ले-आऊट मंजूर केले.

चौकशीमध्ये अडथळा

चौकशी समितीला तपासणीसाठी श्रीमती जाधव यांनी नस्ती देण्यास नकार दिला आहे. तसेच, कारणे दाखवा नोटीस बजावण्यासाठी गेले असता नोटीस घेण्यासही त्यांनी नकार दिला आहे. त्यामुळे श्रीमती जाधव यांना निलंबित केल्याशिवाय चौकशी करता येणार नाही, असे उपविभागीय अधिकाऱ्यांनी म्हटले आहे.

पुढील कार्यवाही

उपविभागीय अधिकाऱ्यांनी अहवाल पुढील कार्यवाहीसाठी जिल्हाधिकारी आणि अपर मुख्य सचिव (महसूल व वन विभाग) यांना सादर केला आहे.

काळे कारनामे करणारा लिपिक मध्यस्थ

हे सर्व काळे कारनामे करण्यात एक लिपिक मध्यस्थी करीत होता. तुळजापुरात ड्युटी असताना, त्या लिपिकास मॅडमने खास धाराशिवमध्ये मध्यस्थी करण्यास ठेवले होते. मॅडम बरोबर हा काळे कारनामे करणारा लिपिक मालामाल झाला आहे. या लिपिकाने बारुळ येथे लाखो रुपयाची शेतजमीन घेतली असून, तुळजापुरात बंगला बांधला आहे.