धाराशिव | धाराशिव जिल्ह्यातील मुरुम, नळदुर्ग आणि तुळजापूर पोलीस ठाण्यांच्या हद्दीत चोरीच्या तीन वेगवेगळ्या घटना उघडकीस आल्या असून, याप्रकरणी संबंधित पोलीस ठाण्यांमध्ये भारतीय न्याय संहिता (BNS) अंतर्गत गुन्हे दाखल करण्यात आले आहेत.
मुरुम पोलीस ठाण्याच्या हद्दीतील दाळींब (ता. तुळजापूर) येथे बालाजी शंकर भुजबळ (वय 47) यांची अंदाजे ₹30 हजार किंमतीची होंडा ॲक्टिव्हा (MH-14 JK-6362) ही दुचाकी 19 जुलै रोजी दुपारी व्यंकट साधू टेकाळे यांच्या शेतातील गोदामासमोरून अज्ञात चोरट्याने चोरून नेली. याप्रकरणी 27 जुलै रोजी दिलेल्या फिर्यादीवरून मुरुम पोलीस ठाण्यात भारतीय न्याय संहिता कलम 303(2) अन्वये गुन्हा दाखल करण्यात आला आहे.
दरम्यान, नळदुर्ग पोलीस ठाण्याच्या हद्दीतील अणदूर शिवारातील स्टर्लिंग ॲड व्हिल्सन प्रायव्हेट लिमिटेड या सौरऊर्जा प्रकल्पातून 3,000 मीटर लांबीची सुमारे ₹90 हजार किंमतीची कॉपर केबल चोरीस गेल्याची घटना समोर आली आहे. या प्रकरणात राहुल शैलेश शिंदे (रा. निलेगाव, ता. तुळजापूर) व इतर पाच जणांविरुद्ध गुन्हा दाखल करण्यात आला आहे. फिर्यादी अंकुश मल्लारी लोखंडे (वय 60), सुरक्षा पर्यवेक्षक यांनी दिलेल्या तक्रारीवरून कलम 303(2) व 3(5) अन्वये गुन्हा नोंदविण्यात आला आहे.
तसेच तुळजापूर येथील छत्रपती शिवाजी महाराज (जुने) बसस्थानकातील बोअरवेलमधील 540 फूट थ्री-फेज वायर चोरीस गेल्याची घटना घडली. सुमारे ₹25 हजार किंमतीची वायर राहुल छगन क्षीरसागर, अब्बास शम्मू नदाफ (दोघे रा. तुळजापूर) व रोहन संदीप क्षीरसागर (रा. गौडगाव, ता. बार्शी) यांनी चोरल्याचा आरोप आहे. याप्रकरणी अमोल भास्कर लोमटे यांनी दिलेल्या फिर्यादीवरून तुळजापूर पोलीस ठाण्यात भारतीय न्याय संहिता कलम 303(2) व 3(5) अन्वये गुन्हा दाखल करण्यात आला आहे.
