वाशी – तालुक्यातील बारलोणी येथील पारधी पिढीवर धार्मिक कार्यक्रमादरम्यान दोन गटांत किरकोळ कारणावरून तुंबळ हाणामारी झाल्याची धक्कादायक घटना घडली आहे. या वादात तलवार, दगड, काठ्या आणि बिअरच्या बाटल्यांचा मुक्त वापर करण्यात आला असून, हल्ल्यात दोन्ही बाजूचे अनेक जण गंभीर जखमी झाले आहेत. याप्रकरणी वाशी पोलीस ठाण्यात दोन्ही गटांच्या परस्परविरोधी तक्रारींवरून एकूण २५ जणांविरुद्ध भारतीय न्याय संहितेसह (BNS) आर्म ॲक्ट अंतर्गत गुन्हे दाखल करण्यात आले आहेत. ही घटना २० मे रोजी सायंकाळच्या सुमारास घडली असून, २३ मे रोजी याप्रकरणी गुन्हे नोंदवण्यात आले.
पहिला गट: ‘बँजो का बंद केला?’ यावरून जीवे मारण्याचा प्रयत्न
पहिल्या घटनेत फिर्यादी रामदास बापू पवार (वय ५९, रा. शिवशक्तीनगर, वाशी) यांनी दिलेल्या तक्रारीनुसार, २० मे रोजी दुपारी ४ ते ४.३० वाजण्याच्या सुमारास बारलोणी पारधी पिढी येथे त्यांच्या समाजाचा धार्मिक कार्यक्रम सुरू होता. या कार्यक्रमात ‘बँजो का बंद केला?’ या कारणावरून आरोपींनी वाद उकरून काढला.
आरोपींनी रामदास पवार व त्यांच्या नातेवाईकांना जीवे मारण्याच्या उद्देशाने शिवीगाळ करत लाथाबुक्क्यांनी, तलवार, दगड आणि बिअरच्या बाटलीने बेदम मारहाण केली. यात अनेक जण गंभीर जखमी झाले.
यांच्यावर झाला गुन्हा दाखल (पहिला गट):
सकींदर सायबा पवार, विलास पवार, प्रकाश पवार, अर्जुन पवार, अमोल पवार, चंद्रकांत पवार, अंकुश पवार, लहु पवार, भिमा पवार, सचिन पवार (सर्व रा. लोणखस पारधी पिढी, पारगाव), किरण पवार, राहुल पवार (दोघे रा. बारलोणी), शंकर शिंदे, काका शिंदे (दोघे रा. हातोला), बबलु शिंदे, रोहीदास शिंदे आणि आबा काळे (तिघे रा. पिंपळगाव क., ता. वाशी).
दुसरा गट: ‘धार्मिक कार्यक्रमाचे आमंत्रण का दिले नाही?’
याच घटनेला उत्तर म्हणून दुसऱ्या गटाकडून शंकर लक्ष्मण पवार (वय २५, रा. लोणखस पारधी पिढी, ता. वाशी) यांनी फिर्याद दिली आहे. त्यांच्या तक्रारीनुसार, त्याच दिवशी (२० मे) सायंकाळी ५ ते ६ वाजण्याच्या सुमारास आरोपींनी ‘धार्मिक कार्यक्रमासाठी आम्हाला निमंत्रण का दिले नाही?’ या कारणावरून वाद घातला.
आरोपींनी शंकर पवार आणि त्यांच्या नातेवाईकांना जीवे मारण्याच्या उद्देशाने लाथाबुक्क्यांनी, तलवार, काठ्या आणि दगडांनी बेदम मारहाण करून गंभीर जखमी केले.
यांच्यावर झाला गुन्हा दाखल (दुसरा गट):
रामदास बापू पवार, दामोदर पवार, परसु पवार, गणेश पवार (सर्व रा. वाशी), आबा पवार, अविनाश पवार (दोघे रा. तांदुळवाडी, ता. वाशी) आणि शिवाजी काळे (रा. कासारखणी पारधी पिढी, वाशी).
तलवार आणि घातक शस्त्रांचा वापर; पोलिसांत गुन्हे
या दोन्ही हिंसक घटनांनंतर वाशी पोलिसांनी गंभीर दखल घेतली आहे. दोन्ही गटांच्या फिर्यादीवरून वाशी पोलीस ठाण्यात भारतीय न्याय संहिता (BNS) कलम १०९ (जीवे मारण्याचा प्रयत्न), ११८ (घातक शस्त्रांनी दुखापत करणे), ३५२, १८९, १९१, १९०, ३५१ आणि आर्म ॲक्ट (हत्यार कायदा) कलम ४/२५ अन्वये गुन्हे दाखल केले आहेत. पोलीस या प्रकरणाचा पुढील तपास करत असून परिसरात शांतता राखण्याचे आवाहन करण्यात आले आहे.
