धाराशिव: शहरातील छत्रपती संभाजी महाराज चौकात स्वस्तात सोन्याची माळ देण्याचे आमिष दाखवून एका २२ वर्षीय तरुणीची तब्बल ३ लाख ५० हजार रुपयांची फसवणूक झाल्याचा धक्कादायक प्रकार उघडकीस आला आहे. या प्रकरणी धाराशिव शहर पोलीस ठाण्यात दोन अज्ञात व्यक्तींवर गुन्हा दाखल करण्यात आला आहे.
मिळालेल्या माहितीनुसार, स्नेहल दत्ता नन्नवरे (वय २२, सध्या रा. कुरणे नगर, धाराशिव; मूळ रा. भातंब्रे, ता. बार्शी, जि. सोलापूर) यांनी या संदर्भात पोलिसांत फिर्याद दिली आहे.
नेमकी घटना काय?
१० डिसेंबर २०२५ रोजी दुपारी साडेबारा वाजेच्या सुमारास स्नेहल या छत्रपती संभाजी महाराज चौकातील एका रिटेल-होलसेल दुकानाजवळ असताना दोन अनोळखी इसम त्यांच्याजवळ आले. या दोघांनी गोड बोलून स्नेहल यांचा विश्वास संपादन केला. त्यानंतर ‘आम्हाला पैशांची गरज असून, अत्यंत कमी किमतीत सोन्याची माळ विकायची आहे’, असे सांगून त्यांनी स्नेहल यांची दिशाभूल केली.
त्यांच्या भुलथापांना बळी पडून स्नेहल यांनी ती माळ विकत घेण्याचे ठरवले आणि आरोपींना ३ लाख ५० हजार रुपये दिले. मात्र, नंतर त्या माळेची तपासणी केली असता ती माळ सोन्याची नसून पितळसदृश बनावट धातूची असल्याचे त्यांच्या लक्षात आले.
आपली मोठी फसवणूक झाल्याचे लक्षात आल्यानंतर, स्नेहल नन्नवरे यांनी काल, ६ मार्च २०२६ रोजी धाराशिव शहर पोलीस ठाण्यात धाव घेत तक्रार दिली. या प्रथम खबरीवरून पोलिसांनी दोन अज्ञात आरोपींविरुद्ध भारतीय न्याय संहिता कलम ३१८(४) अन्वये फसवणुकीचा गुन्हा नोंदवला आहे. धाराशिव शहर पोलीस आता या अज्ञात भामट्यांचा शोध घेत आहेत.
टीप: नागरिकांनी अनोळखी व्यक्तींकडून स्वस्तात सोने किंवा इतर मौल्यवान वस्तू खरेदी करण्याच्या आमिषाला बळी पडू नये, असे आवाहन पोलिसांकडून वारंवार केले जाते.
