धाराशिव – शहरात एक धक्कादायक घटना समोर आली आहे. उधारीवर दाढी कटिंग करण्यास नकार दिल्याच्या क्षुल्लक कारणावरून एका तरुणावर धारदार हत्याराने हल्ला करण्यात आला. ही घटना पोस्ट ऑफिसजवळ असलेल्या न्यू क्लासिक जेंट्स पार्लरमध्ये घडली. ऋतुराज मोरे असे हल्ल्यात गंभीर जखमी झालेल्या तरुणाचे नाव आहे.
मिळालेल्या माहितीनुसार, आरोपीने पार्लरमध्ये येऊन दाढी कटिंग करण्याची मागणी केली आणि पैसे नसल्याने उधारीत करण्यास सांगितले. मात्र, दुकानातील कर्मचाऱ्यांनी उधारीवर सेवा देण्यास नकार दिला. याचा राग मनात धरून आरोपीने ऋतुराज मोरे यांच्यावर धारदार हत्याराने हल्ला चढवला. या हल्ल्यात ऋतुराज यांच्या डोक्याला गंभीर दुखापत झाली आहे.
घटनेनंतर ऋतुराज यांना तातडीने जिल्हा शासकीय रुग्णालयात दाखल करण्यात आले असून, त्यांच्यावर अतिदक्षता विभागात (आयसीयू) उपचार सुरू आहेत. त्यांची प्रकृती गंभीर असल्याचे समजते.
या घटनेमुळे परिसरात तणावाचे वातावरण निर्माण झाले आहे. पोलिसांनी या प्रकरणी तात्काळ कारवाई करून आरोपीला अटक करावी आणि अशा प्रकारे दहशत पसरवणाऱ्यांवर कठोर कारवाई करावी, अशी मागणी परिसरातील नागरिकांकडून जोर धरत आहे. या घटनेने शहरातील कायदा व सुव्यवस्थेचा प्रश्न पुन्हा एकदा ऐरणीवर आला आहे.
