धाराशिव – राज्यात एकनाथ शिंदे यांच्या बंडखोरीनंतर ‘काय झाडी, काय डोंगर, काय हाटेल...’ या गुवाहाटी दौऱ्याची जोरदार चर्चा झाली होती. आता याच गुवाहाटी पॅटर्नला लाजवेल अशी ‘विमानवारी’ चक्क धाराशिव जिल्हा परिषदेच्या सदस्यांनी अनुभवली आहे. धाराशिवसारखा मागासलेला जिल्हा… पण इथल्या झेडपीच्या (ZP) सत्तेचा रुबाब मात्र थेट प्रायव्हेट जेटच्या उंचीवर पोहोचला आहे!
नेमकं काय घडलंय?
९ फेब्रुवारीला धाराशिव जिल्हा परिषदेचा निकाल लागला. सर्वाधिक जागा जिंकून भाजपने मुसंडी मारली, पण सत्तेचा तिढा काही सुटेना. अध्यक्ष-उपाध्यक्षपदाच्या निवडणुकीची तारीख अद्याप जाहीर नाही. मग अशा ‘रिकाम्या’ वेळात करायचे काय? ‘चला सहलीला!’ असा विचार करत भाजप, राष्ट्रवादी, अपक्ष आणि शिवसेनेचे २ असे एकूण ३१ सदस्य थेट ‘नॉट रिचेबल’ झाले.
सहलीचा थाट बघा…
ही काही साधीसुधी एसटी बसची सहल नव्हती. या सदस्यांनी आधी मुंबई, मग कोकण असा दौरा करत थेट कर्नाटक गाठलं.
-
मुक्काम: आलिशान थ्री-स्टार हॉटेल्समध्ये!
-
फिरस्ती: कर्नाटकात चक्क जंगल सफारी आणि गोकर्णच्या ‘ओम बीच’वर लाटांची मज्जा!
-
एन्ट्री: ‘महायुतीचीच सत्ता स्थापन करा’ असा वरिष्ठ नेत्यांचा आदेश येताच, या सदस्यांची महाराष्ट्रात थेट प्रायव्हेट जेटने (खासगी विमानाने) ग्रँड एन्ट्री झाली!
जनतेच्या जखमेवर मीठ?
सध्या या सदस्यांच्या मौजमजेचे आणि डान्सचे व्हिडिओ सोशल मीडियावर तुफान व्हायरल होत आहेत. एरवी विकासाच्या प्रतीक्षेत असलेला, दुष्काळ आणि मागासलेपणाचा शिक्का बसलेला धाराशिव जिल्हा एकीकडे, तर झेडपीच्या सत्तेसाठी प्रायव्हेट जेटने उडणारे नेते दुसरीकडे!
हा विरोधाभास पाहून धाराशिवच्या जनतेमध्ये तीव्र संताप आणि आश्चर्य व्यक्त केले जात आहे. “जिल्हा परिषदेची सत्ता एवढी महत्त्वाची असते का, की त्यासाठी विमानाचे चार्टर्ड उड्डाण करावे लागते?” असा थेट सवाल आता मतदार विचारू लागले आहेत.
सत्तेचा हा ‘हवा-हवाई’ खेळ आता कोणती राजकीय वळणे घेतो आणि जिल्हा परिषदेच्या खुर्चीवर कोण बसतो, हे पाहणे रंजक ठरणार आहे. पण तूर्तास तरी, धाराशिवच्या या ‘गुवाहाटी २.०’ ची राज्यभर जोरदार चर्चा आहे!
