धाराशिव – धाराशिव, सोलापूर आणि लातूर जिल्ह्यात ४२ हून अधिक गंभीर गुन्हे दाखल असलेला सराईत गुन्हेगार कृष्णा श्रावण शिंदे (२५ वर्षे) याला आज धाराशिव जिल्हा कारागृहातून ताब्यात घेऊन हर्सुल कारागृह, छत्रपती संभाजीनगर येथे स्थानबद्ध करण्यात आले.
शिंदे याच्यावर धाराशिव शहरातील विविध पोलीस ठाण्यांमध्ये घरफोडी, चोरी, दरोडा अशा अनेक गुन्ह्यांची नोंद आहे. त्याच्या गुन्हेगारी कारवायांमुळे नागरिकांमध्ये दहशतीचे वातावरण होते. सध्या सुरू असलेल्या विधानसभा निवडणुकीच्या पार्श्वभूमीवर कायदा व सुव्यवस्था राखण्याच्या दृष्टीने जिल्हा पोलीस अधीक्षक संजय जाधव यांनी शिंदेला स्थानबद्ध करण्याचा प्रस्ताव जिल्हाधिकाऱ्यांना सादर केला होता. जिल्हाधिकाऱ्यांनी या प्रस्तावाला मंजुरी दिल्यानंतर शिंदेला ताब्यात घेण्यात आले.
पोलीस निरीक्षक वासुदेव मोरे, सहाय्यक पोलीस निरीक्षक गणेश पाटील, पोलीस हवालदार अश्विनकुमार जाधव, दिलीप जगदाळे आणि पोलीस नाईक ज्ञानदेव गुरव यांच्या पथकाने ही कारवाई केली.
