ढोकी : पोलीस ठाण्यात घुसून कर्तव्य बजावत असलेल्या पोलीस कर्मचाऱ्यांशी मद्यधुंद अवस्थेत हुज्जत घालत, शिवीगाळ करून शासकीय कामात अडथळा आणल्याची घटना ढोकी येथे घडली आहे. याप्रकरणी एका व्यक्तीविरुद्ध ढोकी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, १५ फेब्रुवारी २०२६ रोजी रात्री ११:४५ वाजण्याच्या सुमारास ही घटना घडली. फिर्यादी पोलीस कर्मचारी सुधाकर लक्ष्मणराव तोटावार (वय ५६) आणि सीसीटीएनएस मदतनीस पोलीस अंमलदार पानढवळे हे ढोकी पोलीस ठाण्यात रात्रीच्या वेळी शासकीय कामकाज करत होते.
त्यावेळी आरोपी राजकिरण ढवारे (वय ४५, रा. ढोकी) हा मद्यप्राशन करून पोलीस ठाण्याच्या आवारात आला. त्याने नशेत पोलिसांशी हुज्जत घालण्यास सुरुवात केली. तसेच मोठमोठ्याने आरडाओरड करून असभ्य भाषेत शिवीगाळ केली आणि पोलिसांच्या शासकीय कामात अडथळा निर्माण केला.
या प्रकरणी पोलीस कर्मचारी सुधाकर तोटावार यांनी दिलेल्या फिर्यादीवरून १६ फेब्रुवारी रोजी ढोकी पोलीस ठाण्यात आरोपी राजकिरण ढवारे याच्याविरुद्ध भारतीय न्याय संहिता (BNS) कलम २२१, ३५२, ३५१(२)(३) तसेच महाराष्ट्र दारूबंदी कायदा कलम ८५(१) आणि महाराष्ट्र पोलीस कायदा कलम ११०/११७ अन्वये गुन्हा दाखल करण्यात आला आहे.
