वाशी : पार्डी फाटा (ता. वाशी) येथे एका हॉटेलसमोर दारूच्या नशेत तर्र असलेल्या एका तरुणाने चक्क हातातील रिव्हॉल्व्हरचा (बंदुकीचा) धाक दाखवत दहशत माजवल्याचा धक्कादायक प्रकार उघडकीस आला आहे. या घटनेमुळे परिसरात एकच खळबळ उडाली असून, नागरिकांना घाबरवून शांततेचा भंग केल्याप्रकरणी पुण्यातील एका तरुणावर वाशी पोलीस ठाण्यात गुन्हा दाखल करण्यात आला आहे.
सचिन पांडुरंग आठरे (रा. फ्लॅट नं. सी १०३, आद्या संकल्प सोसायटी, गायकवाड नगर, दिघी, ता. हवेली, जि. पुणे) असे गुन्हा दाखल झालेल्या आरोपीचे नाव आहे. याप्रकरणी सिद्धार्थ मच्छिंद्रनाथ मोरे (वय २१, रा. पार्डी, ता. वाशी, जि. धाराशिव) या तरुणाने फिर्याद दिली आहे.
पोलिसांनी दिलेल्या माहितीनुसार, रविवारी (ता. १० मे) रात्री सव्वा दहा ते साडेदहा वाजेच्या सुमारास पार्डी फाटा येथील कैलास भोसले यांच्या हॉटेलसमोर ही घटना घडली. आरोपी सचिन आठरे हा प्रचंड दारूच्या नशेत होता. त्याने त्याच्याजवळील रिव्हॉल्व्हर अचानक बाहेर काढले आणि फिर्यादी सिद्धार्थ मोरे यांच्यासह तिथे उपस्थित असलेल्या इतर नागरिकांना धाक दाखवून घाबरवले. भररस्त्यात शस्त्राचा धाक दाखवल्यामुळे नागरिकांमध्ये मोठी घबराट पसरली व पार्डी फाट्यावरील शांततेचा भंग झाला.
या थरारक घटनेनंतर फिर्यादी सिद्धार्थ मोरे यांनी मंगळवारी (ता. १२ मे) वाशी पोलीस ठाण्यात धाव घेत रीतसर तक्रार दिली. या प्रथम खबरेवरून पोलिसांनी आरोपी सचिन आठरे याच्याविरुद्ध भारतीय न्याय संहिता (BNS) कलम ३५१(२), १२५ सह भारतीय हत्यार कायदा (आर्म्स ॲक्ट) कलम ३० आणि महाराष्ट्र दारूबंदी कायदा (मदाका) कलम ८५(१) नुसार गुन्हा नोंदवला आहे. या प्रकरणाचा पुढील तपास वाशी पोलीस करत आहेत.
