तेर – तेरणा मध्यम प्रकल्पासाठी संपादित करण्यात आलेल्या सुमारे सव्वाशे एकरांवर अतिक्रमण करून काहींनी गाळ टाकून उंचवटा तयार केला आहे, ज्यामुळे पाण्याचा प्रवाह बदलून शेजारील शेतकऱ्यांच्या जमिनींमध्ये पाणी शिरत असून त्यांचे नुकसान होत आहे. या अतिक्रमणाविरोधात तातडीने कारवाई करण्याची मागणी सोमवारी शेतकरी अभिजित घुटे यांनी जिल्हाधिकारी आणि लघु पाटबंधारे विभागाकडे केली आहे.
प्रकल्पासाठी संपादित झालेले हे क्षेत्र सरकारी मालकीचे असून, तुगाव, रुई ढोकी, मुळेवाडी, तेर आणि गोवर्धनवाडी येथील काही जणांनी या संपादित जमिनीवर बेकायदेशीररीत्या अतिक्रमण केले आहे. या अतिक्रमणधारकांनी गाळ टाकून उंच बांध तयार केला असून, धरण पूर्ण क्षमतेने भरले असताना देखील या क्षेत्रावर पाण्याचा साठा होत नाही. परिणामी, संपादित नसलेल्या शेतकऱ्यांच्या जमिनींमध्ये पाणी घुसून त्यांच्या शेतीचे नुकसान होत आहे.
सध्या या अतिक्रमित क्षेत्रात ऊस आणि सोयाबीन यासारखी पिके घेतली जात असून, या क्षेत्रात धरणाचे पाणी साठत नाही. यामुळे धरणातील पाण्याचा प्रवाह बदलून पाण्याचा साठा अपेक्षित प्रमाणात होत नाही, तसेच सिंचनासाठी ठेवलेले पाणी नदीपात्रातून वाहून जाते. त्यामुळे प्रकल्पाच्या उद्देशावर परिणाम होऊन सिंचनाला फटका बसत आहे.
शेतकरी अभिजित घुटे यांनी या अतिक्रमणाविरोधात तातडीने कारवाईची मागणी केली असून, प्रशासनाने संपादित जागा आपल्या ताब्यात घेऊन त्याचा योग्य वापर करून शेतकऱ्यांचे नुकसान थांबवावे, अशी विनंती जिल्हाधिकाऱ्यांकडे केली आहे.
