नमस्कार वाचकहो! ‘धाराशिव लाइव्ह’च्या या धडाकेबाज मालिकेत तुमचं पुन्हा एकदा स्वागत आहे. आज ‘जागतिक पर्यटन दिन’! आणि या मुहूर्तावर आपले ‘फेसबुक पिंट्या’ साहेब पुन्हा एकदा आपल्या खोट्या आश्वासनांची रंगीत पुडी घेऊन फेसबुकवर प्रकट झाले आहेत. साहेबांच्या नव्या पोस्टचा आणि जुन्या खोट्या घोषणांचा आज आपण पार पंचनामा करणार आहोत!
१. साहेबांची फेसबुकवर ‘पर्यटन’ मुक्ताफळे!
साहेबांनी आज फेसबुकवर एक भलीमोठी पोस्ट टाकून ज्ञान पाजळले आहे. साहेब म्हणतात, “धाराशिवचा वारसा, पर्यटनाची नवी दिशा… आई तुळजाभवानीचे मंदिर, निसर्गरम्य ठिकाणे ही आपली ताकद आहे. यातून हॉटेल व्यावसायिक आणि तरुणांना रोजगार मिळेल, आणि यासाठी आपण सतत प्रयत्नशील आहोत.”
वा रे वा साहेब! वाचायला किती गोड वाटतंय ना? पण जमिनीवरचे वास्तव अत्यंत विदारक आहे. साहेब, पर्यटन दिनाच्या या कोरड्या शुभेच्छा देण्यापेक्षा आधी धाराशिवच्या जनतेच्या खालील ४ थेट प्रश्नांची उत्तरे द्या:
२. साहेबांना ४ थेट आणि सडेतोड सवाल:
-
१. येडशीचे ‘माथेरान’ आणि जंगल सफारी कुठे गेली? दोन वर्षांपूर्वी तुम्ही तुमच्या काही ‘पाकीटमार’ पत्रकारांना घेऊन येडशीच्या रामलिंग अभयारण्यात गेला होतात. तिथे तुम्ही घोषणा केली होती की, “डिसेंबर २०२४ पर्यंत इथे माथेरान होईल, बच्चे कंपनीसाठी रेल्वे ट्रॅक (Toy Train) तयार करून जंगल सफारी सुरू करू!” साहेब, आज २०२६ साल उजाडले… तुमची ती टॉय ट्रेन कोणत्या ट्रॅकवरून घसरली? की ती ट्रेन फक्त तुमच्या फेसबुकवरच धावणार होती?
-
२. तुळजापूरचे हत्ती आणि जिराफ कुठे हरवले? याच पाकीट पत्रकारांना घेऊन तुम्ही तुळजापुरात ‘प्राणी संग्रहालयाची’ मोठी दवंडी पिटली होती. इथे हत्ती, जिराफ आणि उंट येणार असल्याची स्वप्ने दाखवली होती. ते प्राणी कुठे आहेत? की साहेबांच्या पोकळ घोषणा ऐकून प्राण्यांनीही तुळजापुरात यायला नकार दिला?
-
३. आई तुळजाभवानीच्या नावाने राजकारण अन् १८०० कोटींची थाप! आई तुळजाभवानीचे नाव घेऊन राजकारण करताना साहेबांना जराही लाज वाटत नाही. एक वर्षापूर्वी तुम्ही मोठ्या थाटात ‘१८०० कोटींचा विकास आराखडा मंजूर’ झाल्याचे ढोल बडवले होते. पण सत्य हे आहे की, सरकारने आजवर यातला एक दमडाही (पैसा) दिलेला नाही! सध्या तिथे जी काही थोडीफार कामे सुरू आहेत, ती भाविकांनी मंदिराला दिलेल्या देणगीच्या (संस्थानच्या) पैशातून होत आहेत. स्वतःच्या खोट्या श्रेयासाठी तुम्ही ही गोष्ट जनतेपासून का लपवली?
-
४. संत गोरोबा काकांच्या मंदिराला का विसरलात? धाराशिवचे भूषण असलेल्या तेर येथील ‘संत गोरोबा काका’ मंदिराचा आजवर काहीही विकास का झाला नाही? तिथे साहेबांना पर्यटन आणि रोजगार दिसत नाही का? की तिथे पाकीटमार पत्रकारांना घेऊन जायला तुम्हाला वेळ मिळाला नाही?
तात्पर्य: फेसबुक पिंट्या साहेबांचा कारभार म्हणजे ‘बोलाचाच भात आणि बोलाचीच कढी’! आजवर जनतेला वेड्यात काढून, भूलथापा देऊन आणि निवडणुकांमध्ये पैसे वाटून तुम्ही सत्ता मिळवली. पण आता धाराशिवची जनता शहाणी झाली आहे. साहेब, तुम्ही फेसबुकवर कितीही ‘पर्यटन दिन’ साजरे करा, पण येत्या निवडणुकीत जनतेने तुमचा ‘करेक्ट कार्यक्रम’ करायचे ठरवले आहे. यावेळी तुमचा पराभव आणि तुमची कायमची ‘राजकीय सुट्टी’ (पर्यटन) अटळ आहे!
कारण विसरू नका… “यह पब्लिक है, सब जाणती है!”
