कळंब : कळंब शहरात पोलीस असल्याची बतावणी करून एका ५९ वर्षीय महिलेला तब्बल २ लाख २० हजार रुपयांना गंडवल्याची धक्कादायक घटना घडली आहे. ‘या ठिकाणी एका शिक्षिकेचा खून झाला आहे, आम्ही ड्युटीवर आहोत,’ असे सांगून भामट्यांनी महिलेच्या गळ्यातील मंगळसूत्र काढून घेण्यास भाग पाडले आणि हातचलाखीने ते लंपास केले. ही घटना गुरुवारी सकाळी शासकीय विश्रामगृहाजवळ घडली.
सविता सुबराव लांडगे (वय ५९, रा. दत्तनगर, कळंब) यांनी याप्रकरणी कळंब पोलीस ठाण्यात फिर्याद दिली आहे. फिर्यादीनुसार, त्या गुरुवारी सकाळी पावणेअकराच्या सुमारास कळंब-येरमाळा रस्त्यावरून दत्त मंदिराकडे पायी जात होत्या.
त्यावेळी एमएसईबी सबस्टेशनजवळ एका अनोळखी व्यक्तीने त्यांना आवाज दिला. ‘माताजी, यहाँ पे पद्मा टीचर का मर्डर हुआ है, हम पुलीसवाले है,’ असे हिंदीत सांगून त्याने आपले ओळखपत्र दाखवले. पुढे कोणताही अनुचित प्रकार टाळण्यासाठी गळ्यातील मंगळसूत्र काढून सुरक्षित ठेवण्यास सांगितले. त्यानंतर त्याने दुसऱ्या साथीदाराला बोलावून त्यालाही हातातील अंगठी काढून ठेवायला सांगण्याचा बनाव केला.
त्यांच्यावर विश्वास ठेवून सविता लांडगे यांनी आपले मंगळसूत्र बॅगेत ठेवले. याच संधीचा फायदा घेत भामट्यांनी हातचलाखीने बॅगेतून २५ ग्रॅम वजनाचे, अंदाजे २ लाख २० हजार रुपये किमतीचे मंगळसूत्र काढून घेतले आणि जवळच थांबलेल्या मोटारसायकलवर बसून पळ काढला.
या घटनेनंतर सविता लांडगे यांनी तात्काळ कळंब पोलीस ठाण्यात धाव घेऊन तक्रार दाखल केली. त्यांच्या तक्रारीवरून, पोलिसांनी दोन अज्ञात आरोपींविरोधात भारतीय न्याय संहिता कलम ३१९(२) (चोरी) आणि ३०३(२) (लोकसेवकाची तोतयागिरी) अन्वये गुन्हा नोंदवला आहे. पोलीस परिसरातील सीसीटीव्ही फुटेज तपासून आरोपींचा शोध घेत आहेत.
