कळंब: कळंब तालुक्यातील हावरगाव येथे व्याजाच्या पैशांच्या वसुलीसाठी दिलेल्या असह्य मानसिक त्रासाला कंटाळून एका शेतकऱ्याने शेतात गळफास लावून आत्महत्या केल्याची धक्कादायक घटना उघडकीस आली आहे. हावरगाव शिवारातील शेत गट नंबर १० मध्ये हा प्रकार घडला. याप्रकरणी मयताच्या २३ वर्षीय मुलीने दिलेल्या तक्रारीवरून कळंब पोलीस ठाण्यात गावातीलच एका दांपत्याविरुद्ध आत्महत्येस प्रवृत्त केल्याप्रकरणी गंभीर गुन्हा दाखल करण्यात आला आहे.
लिंबाच्या झाडाला घेतला गळफास
पोलिसांकडून मिळालेल्या प्राथमिक माहितीनुसार, मयत लक्ष्मण अर्जुन कोरे (रा. हावरगाव, ता. कळंब, जि. धाराशिव) यांनी १० जुलै २०२६ रोजी पहाटे ३:०० ते सकाळी ६:०० वाजण्याच्या सुमारास हावरगाव शिवारातील शेत गट नंबर १० मध्ये जाऊन तेथील एका लिंबाच्या झाडाला गळफास लावला. सकाळी हा प्रकार ग्रामस्थांच्या निदर्शनास आल्यानंतर कळंब पोलिसांना याची माहिती देण्यात आली. पोलिसांनी घटनास्थळी धाव घेत पंचनामा केला आणि मृतदेह शवविच्छेदनासाठी पाठवला.
व्याजाच्या पैशांच्या वसुलीसाठी दिला जात होता मानसिक त्रास
दरम्यान, लक्ष्मण कोरे यांच्या आत्महत्येमागचे कारण समोर आले असून, पैशांच्या व्यवहारातून हा धक्कादायक प्रकार घडल्याचे स्पष्ट झाले आहे. आरोपींनी कोरे यांना व्याजाचे पैसे परत करण्यासाठी तगादा लावला होता. वसुलीच्या नावाखाली आरोपींकडून कोरे यांना प्रचंड मानसिक त्रास दिला जात होता. आरोपींच्या सततच्या धमक्या, शिवीगाळ आणि छळवणुकीला कंटाळून अखेर लक्ष्मण कोरे यांनी नैराश्यातून आपली जीवनयात्रा संपवण्याचे टोकाचे पाऊल उचलले.
हावरगावच्या कोल्हे दांपत्याविरुद्ध गंभीर गुन्हा दाखल
वडील गमावल्याच्या दुःखात असलेल्या ज्ञानेश्वरी लक्ष्मण कोरे (वय २३ वर्षे, रा. हावरगाव) यांनी १० जुलै २०२६ रोजी कळंब पोलीस ठाणे गाठून आपल्या वडिलांना आत्महत्येसाठी प्रवृत्त करणाऱ्या सावकारांविरुद्ध रीतसर फिर्याद दिली. तिच्या प्रथम खबरीवरून पोलिसांनी गावातील पती-पत्नीवर गुन्हे दाखल केले आहेत:
-
आरोपींची नावे:
१) गुलचंद सुखदेव कोल्हे
२) छाया गुलचंद कोल्हे (दोघे रा. हावरगाव, ता. कळंब, जि. धाराशिव).
-
दाखल कलमे: पोलिसांनी दोन्ही आरोपींविरुद्ध भारतीय न्याय संहिता (BNS) कलम १०८ (आत्महत्येस प्रवृत्त करणे), ११५(२) (शारीरिक/मानसिक दुखापत करणे), ३५२ (अपमान करणे) आणि ३(५) (समान उद्देशाने कट रचणे) अन्वये गुन्हा नोंदवला आहे. कळंब पोलीस या अनधिकृत सावकारी आणि छळवणूक प्रकरणाचा पुढील सखोल तपास करत आहेत.
