धाराशिव: जिल्ह्यात रस्ते अपघातांचे प्रमाण वाढले असून, वेगवेगळ्या चार घटनांमध्ये चार जणांचा दुर्दैवी मृत्यू झाला आहे. तुळजापूर, येडशी (धाराशिव ग्रामीण) आणि लोहारा पोलीस ठाण्याच्या हद्दीत हे अपघात घडले आहेत. याप्रकरणी संबंधित पोलीस ठाण्यात भारतीय न्याय संहितेनुसार गुन्हे दाखल करण्यात आले आहेत.
१. तुळजापूर बायपासवर पिकअप आणि ट्रॅक्टरचा अपघात; राजस्थानी तरुणाचा मृत्यू
तुळजापूर ते लातूर जाणाऱ्या बायपास रोडवरील काक्रंबा चौकाजवळ मंगळवारी (दि. २३) पहाटे ३ वाजण्याच्या सुमारास हा अपघात झाला. राजस्थानमधील बाडमेर जिल्ह्यातील काही नागरिक पिकअप (क्र. एमएच २५ एजे २३१५) मधून प्रवास करत होते. पिकअप चालक आरोपी हरीशकुमार दलारामजी लोहीया याने वाहन निष्काळजीपणे चालवून समोर जाणाऱ्या ट्रॅक्टरच्या ट्रॉलीला धडक दिली.
या भीषण अपघातात निर्मलकुमार शेराराम लोहिया (वय २७, रा. बागथल, राजस्थान) यांचा गंभीर जखमी होऊन मृत्यू झाला. तर चालक हरीशकुमार लोहीया, मैनदर पुनर व पारस पुनर हे जखमी झाले आहेत. याप्रकरणी गगनकुमार शेराराम लोहीया यांच्या फिर्यादीवरून तुळजापूर पोलीस ठाण्यात गुन्हा दाखल करण्यात आला आहे.
२. तुळजापुरात कारच्या धडकेत दुचाकीस्वाराचा मृत्यू
दुसऱ्या घटनेत, तुळजापूरजवळील लहान तीर्थाच्या पुढे वेरना कारने (क्र. टीएस १० ईएस २२१९) दुचाकीला (क्र. एमएच २५ बीबी ९७०५) समोरून जोराची धडक दिली. ही घटना २१ डिसेंबर रोजी सायंकाळी ७ वाजता घडली. या अपघातात दुचाकीस्वार ओंकार पप्पु मुळुक (वय २४, रा. बसवंतवाडी, ता. तुळजापूर) यांचा गंभीर जखमी होऊन मृत्यू झाला. मयताचा भाऊ अजित पप्पु मुळुक यांनी दिलेल्या फिर्यादीवरून कार चालकाविरुद्ध तुळजापूर पोलीस ठाण्यात गुन्हा दाखल करण्यात आला आहे.
३. येडशी घाटात एसटी बसची दुचाकीला धडक; वृद्धाचा मृत्यू
धाराशिव ग्रामीण पोलीस ठाण्याच्या हद्दीत येडशी घाटातील म्हसोबा मंदिराजवळ मंगळवारी (दि. २३) सकाळी ११.२० वाजता अपघात झाला. रोहा आगारच्या एसटी बसने (क्र. एमएच १४ एमएच ०१९८) दुचाकीला धडक दिली. यात दुचाकीस्वार दिलीप गोविंद जाधव (वय ७०, रा. शिराळे, ता. बार्शी) यांचा मृत्यू झाला.
एसटी बस चालक सुर्यकांत गोविंद कलवले (वय ३८, रा. आटोळा, ता. चाकूर) याने हयगयीने बस चालवून अपघात केल्याची फिर्याद बप्पा उत्तम अनपट यांनी दिली आहे. यावरून धाराशिव ग्रामीण पोलीस ठाण्यात गुन्हा नोंदवण्यात आला आहे.
४. लोहाऱ्यात ट्रॅक्टरच्या धडकेत तरुण ठार
लोहारा तालुक्यातील भाऊसाहेब बिराजदार सहकारी साखर कारखाना, समुद्राळ येथे ट्रॅक्टरने दुचाकीला धडक दिल्याने एका तरुणाचा मृत्यू झाला. ही घटना १५ डिसेंबर रोजी घडली होती, मात्र याचा गुन्हा २३ डिसेंबर रोजी दाखल झाला आहे.
भिमाशंकर अंकुश नेलवाडे (वय २६, रा. कोंडजीगड, ता. लोहारा) असे मयताचे नाव आहे. ते आपल्या दुचाकीवरून (क्र. एमएच २५ एयु ११४५) जात असताना ट्रॅक्टर (क्र. एमएच २५ एएल ४६४१) चालक नेताजी खेमा राठोड याने त्यांना समोरून धडक दिली. याप्रकरणी अंकुश नेलवाडे यांच्या फिर्यादीवरून लोहारा पोलीस ठाण्यात गुन्हा दाखल करण्यात आला आहे.
