आंबी : “माझ्या पाठीमागे शिवीगाळ का करतोस?” या क्षुल्लक कारणावरून झालेल्या वादातून एका ६० वर्षीय महिलेला आणि तिच्या पतीला काठीने व लाथाबुक्क्यांनी मारहाण करून जीवे मारण्याची धमकी दिल्याचा प्रकार परंडा तालुक्यातील चिंचपूर बुद्रुक येथे घडला आहे. याप्रकरणी चार जणांविरोधात आंबी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी शोभा सोमनाथ गायकवाड (वय ६०, रा. चिंचपूर बु.) यांनी ही तक्रार दिली आहे. ९ जून २०२५ रोजी दुपारी दोन वाजण्याच्या सुमारास, आरोपी कल्याण काशीनाथ गायकवाड, धनंजय कल्याण गायकवाड, सुमित जयसिंग गायकवाड आणि संग्राम पांडु फाटे यांनी शोभा यांचे पती सोमनाथ गायकवाड यांना ‘आमच्या पाठीमागे शिवीगाळ का करतोस’ असे म्हणत वाद घातला.
याच वादातून आरोपींनी सोमनाथ गायकवाड यांना शिवीगाळ करत लाथाबुक्क्यांनी आणि काठीने मारहाण करून जखमी केले. पतीला होणारी मारहाण पाहून शोभा गायकवाड भांडण सोडवण्यासाठी मध्ये गेल्या असता, आरोपींनी त्यांनाही शिवीगाळ करत काठीने मारहाण केली आणि दोघांनाही जीवे ठार मारण्याची धमकी दिली.
या घटनेनंतर शोभा गायकवाड यांनी १७ जून रोजी आंबी पोलीस ठाण्यात फिर्याद दाखल केली. त्यांच्या तक्रारीवरून पोलिसांनी चौघाही आरोपींविरोधात भारतीय न्याय संहितेच्या कलम ११८(१), ११५(२), ३५२, ३५१(२)(३) आणि ३(५) अन्वये गुन्हा नोंदवला आहे. पोलीस पुढील तपास करत आहेत.
