भूम : महाराष्ट्र शासनाने प्रतिबंधित केलेल्या गुटखा आणि पानमसाल्याची बेकायदा विक्री करण्यासाठी साठा जवळ बाळगल्याप्रकरणी भूम पोलिसांनी एकावर धडक कारवाई केली आहे. या कारवाईत १९ हजार ३२० रुपये किमतीचा विविध कंपन्यांचा गुटखा व सुगंधित तंबाखू जप्त करण्यात आली असून, याप्रकरणी एकावर भूम पोलिस ठाण्यात गुन्हा दाखल करण्यात आला आहे.
अभिजीत हिरालाल रोकडे (वय ३५, रा. शिवशंकर नगर, भूम, जि. धाराशिव) असे गुन्हा दाखल झालेल्या आरोपीचे नाव आहे.
पोलिसांनी दिलेल्या माहितीनुसार, गुरुवारी (दि. ९ एप्रिल) दुपारी सव्वा दोन वाजेच्या सुमारास भूम शहरातील ‘साईनाथ गोळी सेंटर’ या दुकानात शासनाने बंदी घातलेला गुटखा विक्रीसाठी ठेवल्याची माहिती पोलिसांना मिळाली होती. या माहितीच्या आधारे भूम पोलिसांच्या पथकाने सदर दुकानावर छापा टाकला.
या कारवाईदरम्यान दुकानातून रजनीगंधा मसाला, बाबा पानमसाला, आरएमडी पानमसाला, केआर १००० गुटखा, विमल पान मसाला, व्ही-१ टोबॅको, प्रीमियम शॉट सुगंधित तंबाखू, रत्ना छाप तंबाखू आणि बाबा १२० सुगंधित तंबाखू असा एकूण १९ हजार ३२० रुपये किमतीचा अवैध माल मिळून आला. पोलिसांनी हा सर्व प्रतिबंधित माल जप्त केला आहे.
याप्रकरणी आरोपी अभिजीत रोकडे याच्याविरुद्ध भारतीय न्याय संहिता (भा.न्या.सं.) कलम १२३, २७४, २७५ सह अन्न सुरक्षा मानके अधिनियम कलम २६(२)(i), २६(२)(iv), २७(३)(डी) आणि २७(३)(इ) अन्वये भूम पोलिस ठाण्यात गुन्हा नोंदवण्यात आला आहे. या घटनेचा पुढील तपास भूम पोलिस करत आहेत.
