तुळजापूर : तुळजापूर शहरातील पार्किंग परिसरात एका तरुणाला होत असलेली मारहाण सोडवण्यासाठी गेलेल्या ३२ वर्षीय तरुणालाच लोखंडी पाईप, दगड आणि ‘फायटर’ने बेदम मारहाण केल्याची गंभीर घटना घडली आहे. यावेळी आरोपींनी तरुणाला जातीवाचक शिवीगाळही केली असून, याप्रकरणी पाच जणांविरुद्ध तुळजापूर पोलीस ठाण्यात अ‍ॅट्रॉसिटी (SC/ST Act) सह विविध कलमांन्वये गुन्हा दाखल करण्यात आला आहे.
पोलिसांकडून मिळालेल्या माहितीनुसार, भगवान अनिल पारधे (वय ३२, रा. वेताळ नगर, तुळजापूर, जि. धाराशिव) असे या मारहाणीत जखमी झालेल्या फिर्यादी तरुणाचे नाव आहे. रविवारी (ता. ५ एप्रिल) रात्री साडे नऊ वाजण्याच्या सुमारास तुळजापूर येथील पार्किंग परिसरात गणेश कांबळे या तरुणाला काही मुले मारहाण करत असल्याची माहिती भगवान पारधे यांना मिळाली. ही माहिती मिळताच भगवान हे तातडीने घटनास्थळी पोहोचले आणि त्यांनी सुरू असलेले भांडण सोडवण्याचा प्रयत्न केला.
भांडण सोडवण्यासाठी आलेल्या भगवान पारधे यांनाच आरोपींनी लक्ष्य केले. गैरकायद्याची मंडळी जमवून आरोपींनी त्यांना थेट जातीवाचक शिवीगाळ करण्यास सुरुवात केली. त्यानंतर लाथाबुक्क्यांनी, हातातील फायटर, लोखंडी पाईप आणि दगडाने अमानुष मारहाण करून त्यांना जखमी केले.
या घटनेत जखमी झालेल्या भगवान पारधे यांच्यावर रुग्णालयात उपचार करण्यात आले. त्यांनी बुधवारी (ता. ८ एप्रिल) दिलेल्या वैद्यकीय जबाबावरून तुळजापूर पोलीस ठाण्यात सुरज रसाळ, चिंता रसाळ, आशिष पवार, किरण गवते आणि अक्षय परमेश्वर (सर्व रा. तुळजापूर, जि. धाराशिव) या पाचही आरोपींविरुद्ध भारतीय न्याय संहिता (BNS) कलम ११८(१), ३५२, १८९(२), १९१(२), १९१(३), ३५१(२) आणि अनुसूचित जाती-जमाती अत्याचार प्रतिबंधक कायदा (अ‍ॅट्रॉसिटी) कलम ३(१)(आर), ३(१)(एस) अन्वये गुन्हा नोंदवण्यात आला आहे. या प्रकरणाचा पुढील तपास तुळजापूर पोलीस करत आहेत.
