तुळजापूर: अण्णासाहेब पेट्रोल पंपासमोर एका ४१ वर्षीय व्यक्तीला दोघांनी पकडून ठेवत तिसऱ्याने सळई आणि बिअरच्या बाटलीने मारहाण करून गंभीर जखमी केल्याची घटना काक्रंबा (ता. तुळजापूर) येथे घडली. मंगळवारी (ता. १४ एप्रिल) रात्री आठ वाजेच्या सुमारास हा प्रकार घडला. याप्रकरणी तुळजापूर पोलिस ठाण्यात तिघांवर गुन्हा दाखल करण्यात आला आहे.
याबाबत पोलिसांनी दिलेली अधिक माहिती अशी की, फिर्यादी सदाशिव रावसाहेब क्षीरसागर (वय ४१, रा. अण्णासाहेब पेट्रोल पंपासमोर, काक्रंबा) हे मंगळवारी रात्री आठ वाजेच्या सुमारास पेट्रोल पंपासमोर होते. यावेळी गावातीलच आरोपी स्वप्नील भास्कर सरक, विशाल शशिकांत खताळ आणि खंडू सुनील कोरके (सर्व रा. काक्रंबा, ता. तुळजापूर, जि. धाराशिव) हे तिथे आले.
काही समजायच्या आतच आरोपी स्वप्नील आणि विशाल यांनी सदाशिव यांना पकडून ठेवले. याचवेळी आरोपी खंडू याने त्याच्या हातातील सळईने सदाशिव यांच्या डोक्यात पाठीमागून वार करून त्यांना जखमी केले. त्यानंतर त्याने बिअरच्या बाटलीने त्यांच्या कपाळावर डाव्या डोळ्याच्या वरील बाजूस मारून गंभीर दुखापत केली.
या मारहाणीनंतर सदाशिव क्षीरसागर यांनी मंगळवारी (ता. १४) दिलेल्या प्रथम खबरीवरून तुळजापूर पोलिस ठाण्यात आरोपी स्वप्नील सरक, विशाल खताळ आणि खंडू कोरके यांच्याविरुद्ध भारतीय न्याय संहिता (भा.न्या.सं.) कलम ११८(२), ११५(२), ३५२ आणि ३(५) अन्वये गुन्हा नोंदविण्यात आला आहे. या प्रकरणाचा पुढील तपास तुळजापूर पोलिस करत आहेत.
