कळंब- कळंब येथील मुख्य बसस्थानकावर बसमध्ये चढत असताना प्रवाशांच्या गर्दीचा फायदा घेऊन एका अल्पवयीन मुलीच्या गळ्यातील ३० हजार रुपये किमतीचे सोन्याचे दागिने अज्ञात चोरट्याने लांबवल्याची घटना समोर आली आहे. याप्रकरणी कळंब पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
नेमकी घटना काय?
कळंब तालुक्यातील लक्ष्मीनगर पुनर्वसन (सावरगाव) येथील रहिवासी पल्लवी प्रमोदकुमार व्होंदरणे (वय ३९ वर्षे) या २ सप्टेंबर २०२६ रोजी दुपारी १२.४० ते १२.५० वाजेच्या सुमारास आपल्या मुलीसह कळंब बसस्थानकावर आल्या होत्या.
कळंब ते लातूर जाणाऱ्या बसमध्ये त्या आपल्या मुलीसह चढत असताना प्रवाशांची मोठी झुंबड उडाली होती. या गर्दीचा गैरफायदा घेत अज्ञात चोरट्याने अत्यंत चलाखीने फिर्यादी यांच्या मुलीच्या गळ्यातील ३० हजार रुपये किमतीचे ८ ग्रॅम वजनाचे सोन्याचे दागिने शिताफीने चोरून नेले. बसमध्ये गेल्यानंतर मुलीच्या गळ्यातील दागिना गायब असल्याचे आईच्या लक्षात आले.
कळंब पोलिसांत गुन्हा नोंद
परिसरात शोध घेऊनही दागिना न मिळाल्याने अखेर पल्लवी व्होंदरणे यांनी पोलीस ठाण्यात धाव घेतली. त्यांनी ४ सप्टेंबर २०२६ रोजी दिलेल्या प्रथम खबरेवरून कळंब पोलीस ठाण्यात अज्ञात आरोपीविरुद्ध भारतीय न्याय संहिता (BNS) कलम ३०३(२) अन्वये चोरीचा गुन्हा नोंदवण्यात आला आहे. कळंब पोलीस या प्रकरणाचा पुढील तपास करत आहेत.
