उमरगा – उमरगा बायपास रोडवरील गंधर्व हॉटेलसमोर पिकअप वाहनातून कोणत्याही चारा-पाण्याची सोय न करता अत्यंत दाटीवाटीने व क्रूरपणे १० लहान-मोठ्या घोड्यांची (खेचरांची) वाहतूक करणाऱ्या एका पिकअप चालकाला उमरगा पोलिसांनी रंगेहात पकडले आहे. या कारवाईत घोड्यांसह २ लाख ७० हजार रुपयांचे पिकअप वाहन जप्त करण्यात आले असून, प्राण्यांचा छळ प्रतिबंधक कायद्यान्वये गुन्हा नोंदवण्यात आला आहे.
नेमकी कारवाई काय?
उमरगा पोलीस ठाण्याचे पथक हद्दीत गस्तीवर असताना ४ सप्टेंबर २०२६ रोजी मध्यरात्री २.१५ वाजेच्या सुमारास उमरगा बायपासवरील गंधर्व हॉटेलसमोर संशयित पिकअप (क्रमांक AP 39 WG 7409) अडवून तपासणी करण्यात आली.
तपासणीदरम्यान वाहनामध्ये १० लहान-मोठे घोडे (खेचर) अत्यंत अमानुषपणे, चारा-पाण्याची कोणतीही सोय न करता दाटीवाटीने कोंबून बेकायदेशीररीत्या वाहतूक केली जात असल्याचे निदर्शनास आले.
वाहनासह २.७० लाखांचा मुद्देमाल जप्त
पोलिसांनी ७० हजार ७०० रुपये किमतीची १० खेचरे (घोडे) आणि वाहतुकीसाठी वापरण्यात आलेले २ लाख रुपयांचे पिकअप वाहन असा एकूण २ लाख ७० हजार ७०० रुपयांचा मुद्देमाल जप्त केला.
याप्रकरणी वाहन चालक व्यंकटेश व्यंकटय्या पिंन्ड्राला (वय ३३ वर्षे, रा. ७/११ जनार्धन कॉलनी, मार्टुर, जि. प्रकाशम, आंध्र प्रदेश) याच्याविरुद्ध पोलिसांनी सरकारतर्फे दिलेल्या फिर्यादीवरून प्राण्यांना क्रूरतेने वागवण्यास प्रतिबंध अधिनियम कलम ११(१)(डी), ११(१)(एच), ११(ई) सह मोटार वाहन कायदा (MVA) कलम ८३ व १७७ अन्वये गुन्हा दाखल केला आहे. या प्रकरणाचा पुढील तपास उमरगा पोलीस करत आहेत.
