कळंब शहरात सध्या नुसता सस्पेन्स! द्वारका नगरात एका महिलेचा घरातच कुजलेल्या अवस्थेत मृतदेह सापडल्याने खळबळ उडाली आहे. बाहेरून कुलूप, आतून दुर्गंध… अखेर पोलिसांनी दरवाजा तोडला आणि आतलं दृश्य पाहून सगळेच चक्रावले! पण थांबा, पिक्चर अभी बाकी है!
दमानियांचा बॉम्बगोळा आणि पोलिसांची भूमिका:
सामाजिक कार्यकर्त्या अंजली दमानिया यांनी ट्विट करून एक मोठा दावा केला. त्या म्हणाल्या की, ही मृत महिला मस्साजोगचे सरपंच संतोष देशमुख हत्या प्रकरणातील चौकशीचा भाग होती आणि तिला देशमुखवर आरोप करण्यासाठी तयार केलं जात होतं. यामुळे या हत्येमागे देशमुख प्रकरणाचे धागेदोरे दडवण्यासाठी कट रचला गेला की काय, अशी शंका त्यांनी उपस्थित केली. या दाव्याने शहरात चर्चेला उधाण आलं.
पण कळंब पोलिसांनी मात्र दमानियांचा दावा फेटाळून लावला आहे. उपविभागीय पोलीस अधिकारी संजय पवार यांनी स्पष्ट केलंय की, “सध्या तरी या महिलेच्या मृत्यूचा संतोष देशमुख हत्या प्रकरणाशी कोणताही संबंध आढळलेला नाही. हा खुनाचा प्रकार असून, पोस्टमार्टम रिपोर्टनुसार डोक्याला मार लागल्याने मृत्यू झाला आहे. आम्ही दोन आरोपी निष्पन्न केले असून, त्यांना पकडण्यासाठी पथकं रवाना झाली आहेत. तपासात देशमुख प्रकरणाशी काही संबंध आढळल्यास नक्की माहिती देऊ.”
अनेक नावं, एकच चेहरा?
सूत्रांनी दिलेल्या माहितीनुसार, ही मृत महिला (मनीषा कारभारी बिडवे) अनेक नावांनी वावरायची. मनीषा आकुसकर (आडस), मनीषा बिडवे (कळंब), मनीषा मनोज बियाणी (कळंब), मनीषा राम उपाडे (अंबाजोगाई), मनीषा संजय गोंदवले (रत्नागिरी) अशा नावांचा वापर ती करत असल्याची चर्चा आहे. ती पुरुषांना अडकवण्याचं काम करत होती, असंही बोललं जातंय.
काय घडलं नेमकं?
- कळंब शहरातील द्वारका नगरातील एका बंद घरात महिलेचा मृतदेह आढळला.
- मृतदेह अत्यंत कुजलेल्या अवस्थेत होता, त्यामुळे जागेवरच पोस्टमार्टम आणि अंत्यविधी उरकण्यात आला.
- पोलिसांचा प्राथमिक अंदाज खुनाचा आहे, डोक्याला मार लागल्याचे पोस्टमार्टम रिपोर्टमध्ये म्हटले आहे.
- दोन दिवसांपासून परिसरात दुर्गंधी येत होती, पण घराला बाहेरून कुलूप असल्याने कुणाला संशय आला नाही.
- कळंब पोलिसांना माहिती मिळाल्यावर ते घटनास्थळी पोहोचले, त्यानंतर रहिवाशांना प्रकार कळला.
- दोन आरोपी निष्पन्न, पोलीस मागावर.
- अंजली दमानिया यांचा देशमुख हत्या प्रकरणाशी संबंध असल्याचा दावा, पोलिसांनी सध्या हा दावा फेटाळला.
पोलीस आरोपींना कधी पकडणार? या हत्येमागे खरंच देशमुख प्रकरणाचा काही संबंध आहे की प्रकरण वेगळंच आहे? मनीषा बिडवे खरंच अनेक नावांनी वावरायची का? या सगळ्या प्रश्नांची उत्तरं पोलीस तपासानंतरच मिळतील. तोपर्यंत कळंबमधील नागरिक मात्र धास्तावलेले आहेत आणि शहरावर गूढतेचं सावट पसरलं आहे.
Video
