कत्तलखान्याकडे जाणारे ९ गोवंश वाचवले! भूमच्या हाडळ परिसरात स्थानिक गुन्हे शाखेचा छापा

भूम – कत्तलीच्या उद्देशाने ९ लहान-मोठ्या गोवंशीय जनावरांना निर्दयपणे बांधून ठेवल्याचा धक्कादायक प्रकार भूम शहरात उघडकीस आला आहे. स्थानिक गुन्हे शाखेच्या (LCB) पथकाने बुधवारी (१७ जून) सायंकाळी धडक कारवाई करत या सर्व जनावरांची कत्तलखान्यात जाण्यापूर्वी सुटका केली. याप्रप्रकरणी भुम पोलीस ठाण्यात एका संशयिताविरुद्ध गुन्हा दाखल करण्यात आला आहे.

गोपनीय माहितीवरून टाकला छापा

धाराशिवच्या पोलीस अधीक्षक रितु खोखर आणि अप्पर पोलीस अधीक्षक सचिन पांडकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार यांचे पथक भुम परिसरात पेट्रोलिंग करत होते. यादरम्यान पथकाला गोपनीय बातमीदारामार्फत पक्की माहिती मिळाली की, भुम येथील हाडळ परिसरातील प्रकाश चौधरी यांच्या शेतातील मोकळ्या जागेत कत्तल करण्याच्या उद्देशाने काही गोवंशीय जनावरे डांबून ठेवण्यात आली आहेत.

माहिती मिळताच एलसीबीच्या पथकाने सायंकाळी ५:०० वाजण्याच्या सुमारास त्या शेतात अचानक छापा टाकला.

झाडांना आखूड दोरीने बांधली होती जनावरे!

पोलीस घटनास्थळी पोहोचले तेव्हा तिथे अत्यंत क्रूर आणि हृदयद्रावक दृश्य पाहायला मिळाले. चारा किंवा पाण्याची कोणतीही सोय न करता, वेगवेगळ्या झाडांना आणि लाकडांना अगदी आखूड दोरीने ९ लहान-मोठी गोवंशीय जनावरे आणि वासरे अत्यंत निर्दयपणे बांधून ठेवण्यात आली होती.

मुस्तफा कुरेशीवर गुन्हा दाखल

पोलिसांनी आजूबाजूच्या लोकांकडे चौकशी केली असता, ही जनावरे मुस्तफा कुरेशी (वय ३८ वर्षे, रा. भुम) याच्या मालकीची असून त्याने ती कत्तल करण्यासाठीच तिथे आणून बांधल्याचे समोर आले. पोलिसांनी कारवाई करत खालील जनावरे जप्त केली:

• ५ जर्सी गायी

• २ कालवड

• १ गिरगाय

• १ खिल्लार गाय

या सर्व १ लाख २० हजार रुपये किमतीच्या जनावरांना पोलिसांनी ताब्यात घेऊन सुरक्षितपणे भुम पोलीस ठाण्यात आणले. आरोपी मुस्तफा कुरेशी याच्याविरुद्ध भुम पोलीस ठाण्यात गुन्हा नोंदणी क्रमांक ३६७/२०२६ नुसार प्राण्यांचा छळ प्रतिबंधक अधिनियम १९६० चे कलम ११(१) (एफ), ११(१) (एच) अन्वये गुन्हा नोंदवण्यात आला आहे.

या पथकाने केली धडाकेबाज कामगिरी

सदरची यशस्वी कामगिरी पोलीस अधीक्षक श्रीमती रितु खोखर, अपर पोलीस अधीक्षक सचिन पांडकर, स्थानिक गुन्हे शाखेचे पोलीस निरीक्षक विनोद इज्जपवार यांच्या मार्गदर्शनाखाली सपोनि अमोल मोरे, पोलीस अंमलदार समाधान वाघमारे, बळीराम शिंदे, महिला पोलीस अंमलदार शोभा बांगर, पोलीस नाईक अशोक ढगारे आणि चालक पोलीस अंमलदार दहीहांडे यांच्या पथकाने केली आहे.