लोहारा – लोहारा तालुक्यातील तोरंबा शिवारात शेत रस्त्याच्या कारणावरून एका शेतकऱ्याला शिवीगाळ करत लाथाबुक्क्यांनी आणि दगडाने बेदम मारहाण केल्याची धक्कादायक घटना समोर आली आहे. याप्रकारणी लोहारा पोलीस ठाण्यात एका संशयिताविरुद्ध भारतीय न्याय संहितेनुसार (BNS) गुन्हा दाखल करण्यात आला आहे.
मिळालेल्या माहितीनुसार, ज्ञानेश्वर रामकृष्ण कुंभार (वय ४९ वर्षे, रा. तोरंबा, ता. लोहारा, जि. धाराशिव) यांचे तोरंबा शिवारात शेत गट नं. १० मध्ये शेत आहे. रविवार, दि. १४ जून २०२६ रोजी दुपारी ३:३० वाजण्याच्या सुमारास शेत रस्त्याच्या कारणावरून वाद झाला.
या वादातून संशयित आरोपी गोविंद व्यंकट माळी (रा. तोरंबा, ता. लोहारा) याने फिर्यादी ज्ञानेश्वर कुंभार यांना अडवून अश्लील भाषेत शिवीगाळ केली. तसेच लाथाबुक्क्यांनी आणि दगडाने जबर मारहाण करून जखमी केले.
लोहारा पोलिसात गुन्हा दाखल
या मारहाणीनंतर जखमी शेतकरी ज्ञानेश्वर कुंभार यांनी लोहारा पोलीस ठाण्यात धाव घेत तक्रार दिली. त्यांच्या प्रथम खबरेवरून (FIR) आरोपी गोविंद माळी याच्याविरुद्ध भारतीय न्याय संहिता (BNS) कलम १२५(अ), १२६(२), ११५(२), ३५२, ३५१(२)(३) अन्वये गुन्हा नोंद करण्यात आला आहे. या घटनेचा पुढील तपास लोहारा पोलीस करत आहेत.
