मुरुम: शेतातील पार्टीला का येत नाही, या क्षुल्लक कारणावरून एका व्यक्तीला लाथाबुक्क्यांनी व लोखंडी काटा तसेच काठीने मारहाण करून गंभीर जखमी केल्याची घटना मुरुम (ता. उमरगा) नजीक सुंदरवाडी शिवारात घडली आहे. या प्रकरणी एकावर मुरुम पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, युसुफ मकबुल ढोबळे (वय ४५, रा. जैन मंदिराच्या मागे, मुरुम) असे जखमी व्यक्तीचे नाव आहे. मुरुम येथील सुंदरवाडी शिवारात गट नं ३९ (१)(२) मध्ये शाहीन झाकीर हुसेन बागवान यांनी बटईने (हिश्श्याने) केलेल्या शेतात दि. २९ नोव्हेंबर २०२५ रोजी दुपारी साडेबाराच्या सुमारास ही घटना घडली.
आरोपी मोहम्मदीया झाकीर बागवान (रा. अशोक चौक, मुरुम) याने युसुफ ढोबळे यांना “तू पार्टीला का येत नाही?” असे म्हणून वाद घातला. त्यानंतर शिवीगाळ करत त्यांना लाथाबुक्क्यांनी मारहाण केली. एवढ्यावरच न थांबता आरोपीने लोखंडी काटा आणि काठीने मारहाण करत ढोबळे यांना गंभीर जखमी केले. तसेच यावेळी त्यांना जीवे ठार मारण्याची धमकीही देण्यात आली.
या प्रकरणी जखमी युसुफ ढोबळे यांनी २ डिसेंबर रोजी दिलेल्या फिर्यादीवरून मुरुम पोलीस ठाण्यात आरोपी मोहम्मदीया बागवान याच्याविरुद्ध भारतीय न्याय संहिता (BNS) कलम ११८(२), ३५२, ३५१(२) अन्वये गुन्हा नोंदवण्यात आला आहे. पुढील तपास मुरुम पोलीस करत आहेत.
