धाराशिव : राज्य परिवहन महामंडळाच्या (एसटी) चालकाच्या नावे बनावटगिरी करून फसवणूक केल्याप्रकरणी एका व्यक्तीवर बेंबळी पोलीस ठाण्यात गुन्हा दाखल करण्यात आला आहे. मनोज राजेंद्र नागटिळे (रा. करजखेडा मोड, ता. जि. धाराशिव) असे आरोपीचे नाव आहे. ही घटना २८ मे रोजी पाटोदा ते धाराशिव जाणाऱ्या बसमध्ये घडली होती.
याबाबत अधिक माहिती अशी की, २८ मे २०२५ रोजी दुपारी तीन ते चारच्या सुमारास पाटोदा ते धाराशिव जाणाऱ्या बस (क्र. एमएच २० बीएल १३४२) मध्ये आरोपी मनोज नागटिळे प्रवास करत होता. त्याने बसमधील वाहक अश्विनी नागनाथ बनसोडे यांना एसटी चालक एस. बी. क्षिरसागर यांची पेमेंट स्लिप दाखवून तो स्वतःच चालक असल्याचे भासवले. अशाप्रकारे लोकसेवक असल्याची बतावणी करून त्याने तोतयागिरी करत राज्य परिवहन महामंडळाची आणि वाहकांची फसवणूक केली.
याप्रकरणी एसटी महामंडळाच्या धाराशिव डेपोमध्ये वाहक म्हणून कार्यरत असलेल्या अश्विनी नागनाथ बनसोडे (वय ३२, रा. सांगवी, ता. जि. धाराशिव) यांनी ६ जून २०२५ रोजी बेंबळी पोलीस ठाण्यात फिर्याद दिली. त्यांच्या तक्रारीवरून पोलिसांनी आरोपी मनोज नागटिळे विरोधात भारतीय न्याय संहिता कलम २०४ नुसार गुन्हा नोंदवला आहे. या प्रकरणाचा पुढील तपास बेंबळी पोलीस करत आहेत.
