धाराशिव: केंद्र सरकारच्या आज जाहीर झालेल्या अर्थसंकल्पावर धाराशिव – कळंबचे आमदार कैलास पाटील यांनी कठोर टीका केली आहे. “बोलघेवड सरकार आणि त्या सरकारने मांडलेला अर्थसंकल्प देखील असाच स्वप्नांच्या जगात हरवून गेलेला आहे,” असे म्हणत त्यांनी या अर्थसंकल्पाची खिल्ली उडवली.
कैलास पाटील म्हणाले की, “या स्वप्नांच्या दुनियेत देशातील जनतेला फिरवून आणण्याचा प्रयत्न या अर्थसंकल्पात केला आहे.” निवडणुकीत ज्या राज्यात भाजप व महायुतीला लोकांनी झटका दिला, त्या राज्यात केंद्राने आकसबुद्धीने व्यवहार केल्याचे दिसून येत आहे. राज्याकडून केंद्राला विविध करातून मोठा वाटा मिळतो पण केंद्राकडून त्या प्रमाणात काहीच मिळत नाही. यंदा तर हे प्रमाण अजून कमी झालं आहे, ज्यामुळे महाराष्ट्रावरील राग व्यक्त होत आहे. विशेषतः दुष्काळग्रस्त मराठवाड्याकडे केंद्र सरकारने बदल्याची भूमिका घेतल्याचे दिसून येत आहे.
पाटील पुढे म्हणाले, “राजकीय पक्षाकडून सरकारमध्ये गेल्यावर चूक सुधारण्याचे प्रयत्न अपेक्षित असतात, पण हे सरकार चूक मान्य करण्याऐवजी लोकांवर राग काढत आहे. शेतकऱ्यांना या अर्थसंकल्पात नेहमीप्रमाणे वलग्नाच केल्या आहेत. शेतीमालाच्या हमीभावावर हे सरकार ब्र शब्द काढत नाहीत. उत्पादन वाढवण्यासाठी अमुक योजना या तर ठरलेल्या वाक्यांना जनतेने पाठ केले आहे. आयात निर्यात धोरणावर चकार शब्द नं काढणार सरकार दुसऱ्या बाजूला आपले सरकार टिकवण्यासाठी दोन राज्यात निधीचा वर्षाव करत आहे.”
“देश म्हणून सरकारने हा अर्थसंकल्प मांडला की सरकार वाचविण्यासाठी केविलवाणा प्रयत्न केला? असा प्रश्न उपस्थित होत आहे,” असे पाटील म्हणाले. दलित, मुस्लिम, आदिवासी, तरुण, वाढती बेरोजगारी व महागाई आदी प्रश्नावर सरकार सपशेल अपयशी ठरल्याची टीका देखील त्यांनी केली.
(अधिक माहितीसाठी ‘धाराशिव लाइव” फेसबुक पेजला भेट द्या)
