कळंब : कळंब तालुक्यातील मोहा शिवारातील एका शेतातील पत्र्याच्या खुल्या शेडमधून अज्ञात चोरट्यांनी तीन मुऱ्हा जातीच्या म्हशी चोरून नेल्याची घटना घडली आहे. या म्हशींची एकूण किंमत ७५ हजार रुपये असून, याप्रकरणी कळंब पोलीस ठाण्यात अज्ञात व्यक्तीविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, याप्रकरणी सुमंत ऊर्फ बाळासाहेब किसन कसबे (वय ५० वर्षे, रा. मोहा, ता. कळंब, जि. धाराशिव) यांनी फिर्याद दिली आहे. सुमंत कसबे यांचे मोहा शिवारात गट क्रमांक ४६९ मध्ये शेत आहे. या शेतात त्यांनी जनावरांसाठी पत्र्याचे एक उघडे शेड उभारले आहे.
नेमके काय घडले?
१५ फेब्रुवारी २०२६ रोजी रात्री ८ वाजेच्या सुमारास सुमंत कसबे यांनी त्यांच्या तीन मुऱ्हा जातीच्या म्हशी या शेडमध्ये बांधल्या होत्या.
१६ फेब्रुवारी रोजी पहाटे ५ वाजेच्या सुमारास पाहिले असता, या ७५,००० रुपये किमतीच्या तिन्ही म्हशी जागेवर नसल्याचे त्यांच्या निदर्शनास आले. अज्ञात व्यक्तीने रात्रीच्या अंधाराचा फायदा घेत या म्हशी चोरून नेल्या.
या घटनेनंतर परिसरात म्हशींचा शोध घेऊनही त्या न सापडल्याने, अखेर रविवारी, २२ फेब्रुवारी २०२६ रोजी सुमंत कसबे यांनी दिलेल्या प्रथम खबरेवरून कळंब पोलीस ठाण्यात अज्ञात चोरट्याविरुद्ध भारतीय न्याय संहितेच्या (BNS) कलम ३०३(२) अन्वये गुन्हा नोंदवण्यात आला आहे. या घटनेमुळे परिसरातील पशुपालक शेतकऱ्यांमध्ये चिंतेचे वातावरण निर्माण झाले असून, कळंब पोलीस या चोरीचा अधिक तपास करत आहेत.
