परंडा – परंडा तालुक्यातील वडनेर येथे अतिवृष्टीमुळे आलेल्या पुराच्या पाण्यात मध्यरात्रीपासून अडकलेल्या एकाच कुटुंबातील चार जणांना सुखरूप बाहेर काढण्यात यश आले आहे. खासदार ओमराजे निंबाळकर यांनी स्वतः एनडीआरएफच्या (NDRF) जवानांसोबत या बचावकार्यात सहभागी होत या कुटुंबाची सुटका केली. या थरारक बचावकार्यानंतर खासदारांनी फेसबुक पोस्टद्वारे माहिती देत सर्वांचे आभार मानले आहेत.
काय आहे घटना?
मिळालेल्या माहितीनुसार, परंडा तालुक्यात झालेल्या मुसळधार पावसामुळे वडनेर गावात पूरस्थिती निर्माण झाली होती. येथील एका घरात पाणी शिरल्याने एकाच कुटुंबातील चार जण रात्री २ वाजेपासून आपल्याच घराच्या छतावर अडकून पडले होते. यामध्ये एक आजी, एक दोन वर्षांचा लहान मुलगा आणि इतर दोन व्यक्तींचा समावेश होता. अन्न-पाण्याविना हे कुटुंब मदतीच्या अपेक्षेत होते.
घटनेची माहिती मिळताच खासदार ओमराजे निंबाळकर यांनी तातडीने घटनास्थळी धाव घेतली. त्यांनी एनडीआरएफच्या पथकाला पाचारण केले आणि स्वतः त्यांच्यासोबत बचावकार्यात उतरले. अनेक तासांच्या अथक प्रयत्नांनंतर, सायंकाळी ८ वाजण्याच्या सुमारास या कुटुंबाला सुखरूप बाहेर काढण्यात यश आले.
खासदारांची भावनिक फेसबुक पोस्ट
या यशस्वी बचावकार्यानंतर खासदार निंबाळकर यांनी फेसबुकवर एक पोस्ट शेअर केली. त्यात त्यांनी म्हटले आहे की, “आज वडनेर येथे अतिवृष्टीमुळे आलेल्या पुरात एकाच कुटुंबातील एक आजी, २ वर्षांचा मुलगा व २ व्यक्ती रात्री २ पासून पूर्ण पाण्याने वेढले होते व स्वतःच्या घरावर अन्न-पाण्याविना मदतीच्या अपेक्षेने अडकले होते. एनडीआरएफच्या जवानांच्या मदतीने मी स्वतः या कार्यात सहभागी होऊन कुटुंबाला सुखरूपपणे बाहेर काढण्यासाठी आज संध्याकाळी ८ वाजता यश आल्याने मनाला खूप समाधान मिळाले!”
त्यांनी पुढे एनडीआरएफचे जवान आणि गावकऱ्यांचे आभार मानत म्हटले, “या कार्यात एनडीआरएफच्या जवानांनी व गावकऱ्यांनी देखील कष्ट व मेहनत घेऊन सदरील बचावकार्य यशस्वीरित्या पार पाडले, याबद्दल सर्वांचे मनापासून आभार व अभिनंदन!”
या घटनेमुळे लोकप्रतिनिधीने दाखवलेल्या तत्परतेचे आणि एनडीआरएफ व गावकऱ्यांच्या धाडसाचे सर्वत्र कौतुक होत आहे.
