मुरुम: मुलीसोबत सुरू असलेले भांडण मिटवण्यासाठी व समजावून सांगण्यासाठी गेलेल्या एका ६५ वर्षीय वृद्धाला शिवीगाळ करत काठीने बेदम मारहाण केल्याची घटना समोर आली आहे. लोहारा तालुक्यातील भोसगा येथे हा प्रकार घडला असून, याप्रकरणी मुरुम पोलीस ठाण्यात एकावर गुन्हा दाखल करण्यात आला आहे.
दगडू उद्धव आडे (वय ६५, रा. भोसगा, ता. लोहारा) असे मारहाणीत जखमी झालेल्या वृद्धाचे नाव आहे. याप्रकरणी गोविंद भिल्लू राठोड (रा. अचलेर, ता. लोहारा) याच्याविरुद्ध गुन्हा नोंदवण्यात आला आहे.
पोलिसांनी दिलेल्या माहितीनुसार, ही घटना २३ नोव्हेंबर २०२५ रोजी सकाळी १० वाजताच्या सुमारास भोसगा येथील केशव पवार यांच्या घरासमोर घडली. आरोपी गोविंद राठोड हा एका मुलीसोबत भांडण करत होता. हे पाहून दगडू आडे त्याला समजावून सांगण्यासाठी गेले. मात्र, आरोपीने त्यांचे ऐकून न घेता उलट त्यांनाच शिवीगाळ करण्यास सुरुवात केली. आरोपीने आडे यांना लाथाबुक्क्यांनी आणि काठीने मारहाण करून गंभीर जखमी केले. तसेच “तुला जिवे ठार मारतो,” अशी धमकी दिली.
उपचारानंतर दगडू आडे यांनी २७ नोव्हेंबर रोजी मुरुम पोलिसांत धाव घेतली. त्यांच्या फिर्यादीवरून आरोपी गोविंद राठोड विरुद्ध भारतीय न्याय संहिता (BNS) कलम ११७ (२) (गंभीर दुखापत करणे), ११८ (१), ११५ (२), ३५२, ३५१ (२) आणि ३५१ (३) अन्वये गुन्हा दाखल करण्यात आला आहे. पुढील तपास पोलीस करत आहेत.
