शेगाव (बुलढाणा) – बुलढाणा जिल्ह्यातील शेगाव तालुक्यातील काही गावांमध्ये एका विचित्र आजाराने थैमान घातले आहे. या आजाराची लागण झाल्यास केवळ तीन दिवसांतच डोक्यावरचे सर्व केस गळून पडतात आणि पूर्ण टक्कल होते. बोंडगाव, कालवड आणि हिंगणा या गावांमध्ये या आजाराने अनेक जण बाधित झाले असून, नागरिकांमध्ये भीतीचे वातावरण पसरले आहे.
या आजाराची सुरुवात डोक्याला खाज येण्याने होते. त्यानंतर हाताला लावताच केस गळू लागतात आणि तिसऱ्या दिवशी डोके पूर्णपणे टक्कल पडते. लहान मुले आणि महिलाही या आजाराच्या विळख्यात सापडल्याने चिंतेत भर पडली आहे.
या आजाराचे नेमके कारण अद्याप समजू शकलेले नाही. काही जणांच्या मते नदीच्या प्रदूषित पाण्यामुळे हा आजार होत असल्याची शक्यता आहे, तर काही जणांच्या मते केमिकलयुक्त शाम्पूमुळे ही समस्या उद्भवत आहे. मात्र, शाम्पू न वापरणाऱ्यांनाही हा आजार झाल्याने गूढ वाढले आहे. काही तज्ञांनी विषाणूजन्य आजाराचीही शक्यता वर्तवली आहे.
नागरिक खासगी डॉक्टरांकडे धाव घेत असले तरी, अद्याप या आजारावर कोणताही ठोस उपचार सापडलेला नाही. आरोग्य विभागाने तातडीने या गावांमध्ये पथके पाठवून आजाराचे कारण शोधून उपचार सुरू करावेत, अशी मागणी नागरिकांकडून होत आहे.
सरकारने या आजाराकडे गांभीर्याने पाहून तातडीने उपाययोजना करणे गरजेचे आहे. अन्यथा, ही समस्या अधिक गंभीर रूप धारण करू शकते आणि बुलढाणा जिल्ह्यासह संपूर्ण राज्याच्या आरोग्याला धोका निर्माण होऊ शकतो.
