नळदुर्ग : ‘पुढे लुटमार चालू आहे, आम्ही पोलीस आहोत, तुमच्या हातातील सोन्याच्या अंगठ्या काढून खिशात ठेवा’, अशी बतावणी करून तोतया पोलिसांनी एका ५० वर्षीय व्यक्तीची तब्बल १ लाख ५८ हजार रुपयांची फसवणूक केल्याचा प्रकार उघडकीस आला आहे. सोन्याच्या अंगठ्या कागदात बांधून देण्याच्या बहाण्याने खोट्या अंगठ्या खिशात ठेवून हा गंडा घालण्यात आला आहे. याप्रकरणी नळदुर्ग पोलीस ठाण्यात दोन अज्ञात भामट्यांवर गुन्हा दाखल करण्यात आला आहे.
संजय श्रीमंत कोकणे (वय ५० वर्षे, रा. आष्टा कासार, ता. लोहारा, जि. धाराशिव) असे फसवणूक झालेल्या फिर्यादीचे नाव आहे.
पोलिसांनी दिलेल्या माहितीनुसार, १४ फेब्रुवारी २०२६ रोजी दुपारी साडेबारा वाजण्याच्या सुमारास हा प्रकार घडला होता. फिर्यादी संजय कोकणे हे राष्ट्रीय महामार्ग क्र. ६५ (NH 65) वरून नळदुर्ग ते सोलापूर रोडने प्रवास करत होते. इटकळ गावाच्या पुढे असलेल्या ‘महाराष्ट्र रसवंती’जवळ दोन अज्ञात इसमांनी त्यांना अडवले. “आम्ही पोलीस आहोत, पुढे लुटमार चालू आहे, त्यामुळे तुम्ही तुमच्या हातातील सोन्याच्या अंगठ्या काढून सुरक्षित खिशात ठेवा”, अशी थाप मारून त्यांनी कोकणे यांचा विश्वास संपादन केला.
त्यानंतर या भामट्यांनी कोकणे यांच्याजवळील एकूण १ लाख ५८ हजार रुपये किमतीच्या (१० ग्रॅम वजनाच्या) सोन्याच्या अंगठ्या घेतल्या आणि त्या एका कागदात गुंडाळल्याचे नाटक केले. ती कागदाची पुडी त्यांनी कोकणे यांच्या खिशात ठेवली. मात्र, प्रत्यक्षात त्यांनी खऱ्या अंगठ्या हातचलाखीने स्वतःकडे ठेवून खिशात खोट्या अंगठ्या ठेवल्या आणि कोकणे यांची फसवणूक करून तेथून पोबारा केला.
या प्रकरणाबाबत संजय कोकणे यांनी तब्बल सहा दिवसानंतर गुरुवारी, १९ फेब्रुवारी २०२६ रोजी नळदुर्ग पोलीस ठाण्यात प्रथम खबर (FIR) दिली. त्यांच्या तक्रारीवरून नळदुर्ग पोलिसांनी दोन अज्ञात आरोपींविरुद्ध भारतीय न्याय संहिता (BNS) कलम ३१८(४) आणि ३(५) अन्वये फसवणुकीचा गुन्हा नोंदवला आहे. नळदुर्ग पोलीस या तोतया पोलिसांचा शोध घेत आहेत.
