नळदुर्ग – नळदुर्गच्या भुईकोट किल्ल्यातील उपल्या बुरुजावर सेल्फी घेताना तोल जावून पडल्याने एका नवविवाहित तरुणीचा आज मृत्यू झाला आहे.निलोफर अमीर शेख ( वय २२ ) रा. हंगरगा (तूळ) ता. तुळजापूर असे या मृत तरुणीचे नाव आहे. चार दिवसापूर्वीच या तरुणीचे लग्न झाले आहे. नवऱ्यासोबत फिरायला आल्यानंतर ही दुर्घटना घडली आहे.
तुळजापूर तालुक्यातील नळदुर्ग किल्ला पर्यटकांचे आकर्षण बनला आहे. पण या किल्ल्यातील सुरक्षा पुन्हा एकदा ऐरणीवर आली आहे.या किल्याची दुरुस्ती आणि देखभाल सोलापूरच्या युनिटी मल्टीकॉन कंपनीला देण्यात आली होती. कंपनीने लाखो रुपये पर्यटकांकडून वसूल केले. आता मुदत संपली असताना देखील पुरातत्व विभागाच्या अधिकाऱ्यांना धरून वसुली सुरु आहे. मुदत संपूनही युनिटी मल्टीकॉन कंपनीने किल्ला न सोडल्याने या दुर्घनेला जबाबदार कोण ? असा प्रश्न विचारला जात आहे.
अशी घडली दुर्घटना
धोकादायक ठिकाणी उभा राहून सेल्फी काढण्याचा मोह अनेकांना सुटत नाही. मात्र अशा सेल्फीमुळे आपण आपला जीव धोक्यात घालत आहोत याची कल्पना फोटो काढताना येत नाही. अनेकदा धोकादायक ठिकाणी सेल्फी काढताना खाली पडून मृत्यू झाल्याच्या घटना घडल्या आहेत. आता नळदुर्ग किल्ल्यात उपल्या बुरुजावर उभा राहून सेल्फी काढताना तोल गेल्यानं एका नवविवाहितेचा मृत्यू झाल्याची घटना घडलीय. अवघ्याचार दिवसांपूर्वी लग्न झालेल्या तरुणीच्या मृत्यूने मोठी खळबळ उडाली आहे.
तुळजापूर तालुक्यातली हँगरगा (तूळ ) गावची तरुणी आपल्या नवऱ्यासोबत नळदुर्ग किल्ल्यावर फिरायला आली होती. दहा दिवसांपूर्वीच तिचं लग्न झालं होतं. लग्नानंतर फिरायला ती किल्ल्यावर आली होती. तेव्हा नळदुर्ग किल्ल्यातल्या उपल्या बुरुजावर ती सेल्फी घेत होती. तेव्हा तोल जाऊन ती खाली पडली.
तरुणी बुरुजावरून खाली पडल्यानं गंभीर जखमी झाली होती. तिला उपचारासाठी नळदुर्ग उपजिल्हा रुग्णालयात दाखल कऱण्यात आले. मात्र डॉक्टरांनी तिचा मृत्यू झाल्याचं सांगितलं. निलोफर अमीर शेख असं २२ वर्षीय तरुणीचं नाव आहे.
ऐतिहासिक नळदुर्ग किल्ल्यातील उपल्या बुरुजास एकूण ७७ पायऱ्या आहेत. हा बुरुज पर्यटकांचे आकर्षण आहे पण या बुरुजाला कसलीही सुरक्षा नाही. त्यामुळेच सेल्फीच्या नादात एका नवविवाहित तरुणीची हकनाक बळी गेला आहे.
