नळदुर्ग- तुळजापूर ते नळदुर्ग रस्त्यावरील चिवरी पाटी येथे नळदुर्ग पोलिसांनी रविवारी (दि. १४ जून) सकाळी एक मोठी कारवाई केली आहे. कत्तलीच्या उद्देशाने अत्यंत क्रूरपणे आणि बेकायदेशीररीत्या वाहनांमध्ये कोंबून वाहतूक केली जाणारी तब्बल २५ गोवंशीय जनावरे पोलिसांनी जप्त केली आहेत. या कारवाईत पोलिसांनी ४ अशोक लेलँड पिकअप गाड्यांसह एकूण ६ लाख ४ हजार रुपयांचा मुद्देमाल जप्त करत ४ जणांवर गुन्हा दाखल केला आहे.
पोलिसांनी दिलेल्या माहितीनुसार, दि. १४ जून २०२६ रोजी सकाळी १०:०० वाजण्याच्या सुमारास तुळजापूर ते नळदुर्ग जाणाऱ्या रस्त्यावरील चिवरी पाटी येथे चार संशयास्पद वाहने नळदुर्ग पोलिसांना मिळून आली. पोलिसांनी या वाहनांची तपासणी केली असता, त्यात कोणतीही चारा-पाण्याची व्यवस्था न करता, निर्दयतेने व क्रूरपणे गोवंशीय जनावरे कोंबून कत्तलीसाठी नेली जात असल्याचे उघड झाले.
४ वाहनांमधून ‘या’ जनावरांची होत होती वाहतूक:
१) गाडी क्र. MH 13 AN 9753 : ३ जर्सी गायी आणि ४ खोंडे.
२) गाडी क्र. MH 13 CU 5179 : १ जर्सी गाय आणि ५ कालवडी.
३) गाडी क्र. MH 25 AJ 2908 : ५ रेडे, १ वगार, ३ कालवडी आणि ३ खोंडे.
४) गाडी क्र. MH 24 AU 3596 : ३ जर्सी गायी.
‘या’ संशयित आरोपींवर गुन्हा दाखल:
या बेकायदेशीर जनावरांच्या वाहतूकप्रकरणी पोलिसांनी खालील चार जणांवर कारवाई केली आहे:
१) महादेव इंद्रजीत कांबळे (वय ३४ वर्षे, रा. भंडारी, ता. जि. धाराशिव)
२) विशाल विकास बनसोडे (वय ३५ वर्षे, रा. वडगाव देव, ता. तुळजापूर)
३) महादेव गोविंद धाकतोडे (वय ५० वर्षे, रा. सारोळा, ता. तुळजापूर, जि. धाराशिव)
४) लखन हनुमंत मोटे (वय ३० वर्षे, रा. काक्रंबा, ता. तुळजापूर, जि. धाराशिव)
पोलिसांची सरकारतर्फे फिर्याद
या कारवाईनंतर नळदुर्ग पोलीस ठाण्यात सरकारतर्फे संशयित आरोपींविरुद्ध प्राण्यांना क्रूरतेने वागवण्यास प्रतिबंध अधिनियम कलम ११(१) सह महाराष्ट्र प्राणी संरक्षण अधिनियम कलम ५(अ), ९ अन्वये गुन्हा नोंद करण्यात आला आहे. नळदुर्ग पोलीस या प्रकरणाचा पुढील सखोल तपास करत असून ही जनावरे कोठून आणली आणि कोठे नेली जात होती, याचा शोध घेत आहेत.
