नळदुर्ग: राज्य शासनाने बंदी घातलेला गुटखा आणि पान मसाला बेकायदेशीररीत्या विक्रीसाठी बाळगल्याप्रकरणी नळदुर्ग पोलिसांनी जळकोट (ता. तुळजापूर) येथे मोठी कारवाई केली आहे. बसस्थानक परिसरातील एका दुकानावर सोमवारी (ता. २०) टाकलेल्या छाप्यात पोलिसांनी तब्बल १ लाख १६ हजार ५४७ रुपये किमतीचा प्रतिबंधित गुटखा जप्त केला असून, याप्रकरणी एकाविरुद्ध नळदुर्ग पोलीस ठाण्यात गुन्हा दाखल करण्यात आला आहे.
संजयकुमार विश्वनाथ हुलसुरे (वय ४०, रा. जळकोट, ता. तुळजापूर, जि. धाराशिव) असे गुन्हा दाखल झालेल्या आरोपीचे नाव आहे.
छाप्यात नेमकं काय आढळलं?
पोलिसांनी दिलेल्या माहितीनुसार, जळकोट येथील बसस्थानक परिसरात असलेल्या ‘सोनाई ट्रेडर्स’मध्ये शासनाने प्रतिबंधित केलेला गुटखा विक्रीसाठी साठवून ठेवल्याची माहिती नळदुर्ग पोलिसांना मिळाली होती. या माहितीच्या आधारे सोमवारी दुपारी बाराच्या सुमारास नळदुर्ग पोलिसांच्या पथकाने सदर ठिकाणी छापा टाकला.
या कारवाईदरम्यान दुकानातून खालील प्रतिबंधित साहित्य मिळून आले:
-
रजनीगंधा मसाला
-
विमल पान मसाला
-
व्ही-१ तंबाखू
-
डायरेक्टर पान मसाला
पोलिसांनी हा सर्व १ लाख १६ हजार ५४७ रुपये किमतीचा मुद्देमाल जप्त केला आहे.
गुन्हा दाखल
याप्रकरणी नळदुर्ग पोलीस ठाण्यात आरोपी संजयकुमार हुलसुरे याच्याविरुद्ध भारतीय न्याय संहिता (BNS) कलम १२३, २२३, २७४, २७५ सह अन्न सुरक्षा आणि मानके अधिनियम कलम ५९ अन्वये गुन्हा नोंदवण्यात आला आहे. या धडक कारवाईमुळे परिसरात अवैध गुटखा विक्री करणाऱ्यांचे धाबे दणाणले आहेत.
