नळदुर्ग : तुळजापूर तालुक्यातील गंधोरा शिवारात पवनचक्कीच्या तारा ओढण्याचे काम सुरु असताना शासकीय कामात अडथळा निर्माण करत पोलिसांसह कामगारांना शिवीगाळ व दगडफेक केल्याचा धक्कादायक प्रकार उघडकीस आला आहे. कामगारांना तारेने मारहाण करून जखमी केल्याप्रकरणी नळदुर्ग पोलिस ठाण्यात तिघांविरुद्ध मंगळवारी (ता. १७) गुन्हा दाखल करण्यात आला आहे.
याप्रकरणी नळदुर्ग पोलिस ठाण्याचे अंमलदार शंकर पुंडलिक कांबळे (वय ३७) यांनी सरकारतर्फे फिर्याद दिली आहे. त्यानुसार रुक्मिणी कल्लाप्पा राठोड (रा. गंधोरा तांडा, ता. तुळजापूर), रेणुका राजेश राठोड आणि राजेश राठोड (दोघे रा. खोपोली, ता. खालापूर, जि. रायगड) अशी गुन्हा दाखल झालेल्या संशयित आरोपींची नावे आहेत.
पोलिसांनी दिलेल्या माहितीनुसार, सोमवारी (ता. १६) दुपारी तीन वाजण्याच्या सुमारास गंधोरा शिवारातील गट क्रमांक २८४ व २८५ मध्ये पवनचक्कीच्या तारा ओढण्याचे काम सुरु होते. उपविभागीय पोलिस अधिकारी आणि तुळजापूरच्या तहसीलदारांनी दिलेल्या आदेशाचे उल्लंघन करत आरोपींनी तिथे प्रवेश केला. त्यानंतर त्यांनी पवनचक्कीचे काम करणाऱ्या कामगारांना शिवीगाळ करत दगड व तारेने मारहाण केली आणि त्यांना जखमी केले.
दरम्यान, या घटनेत फिर्यादी शंकर कांबळे व इतर साक्षीदार शासकीय काम करत असताना आरोपींनी त्यांच्या कामातही अडथळा आणला आणि दगडफेक केली. याप्रकरणी शंकर कांबळे यांच्या फिर्यादीवरून तिन्ही आरोपींविरुद्ध भारतीय न्याय संहितेच्या (BNS) कलम १३२, १२५, २२३, ११८(१), ११५(२), ३५२, ३(५) अन्वये नळदुर्ग पोलिस ठाण्यात गुन्हा नोंदवण्यात आला आहे. या घटनेचा पुढील तपास नळदुर्ग पोलिस करत आहेत.
