परंडा ड्रग्ज रॅकेट प्रकरण: बार्शी पोलिसांची धडक कारवाई सुरूच, आणखी तिघे गजाआड

बार्शी –  परंडा-बार्शी ड्रग्ज रॅकेट प्रकरणी बार्शी शहर पोलिसांनी तपासाचा धडाका कायम ठेवत आणखी तीन आरोपींच्या मुसक्या आवळल्या आहेत. १७ एप्रिल रोजी केलेल्या कारवाईत तिघांना अटक केल्यानंतर, आता आणखी तिघांना अटक करण्यात आल्याने या गंभीर प्रकरणातील एकूण आरोपींची संख्या सहावर पोहोचली आहे. धक्कादायक म्हणजे, अटक झालेल्या सहा आरोपींपैकी तब्बल चार जण परंड्याचे रहिवासी असल्याने, अमली पदार्थांच्या तस्करीचे परंडा कनेक्शन अधिक स्पष्ट आणि चिंताजनक बनले आहे. पोलिसांच्या या सलग कारवाईमुळे अमली पदार्थ विक्रेत्यांचे धाबे दणाणले आहेत.

नवीन अटक सत्र:

बार्शी पोलिसांनी तपासाची चक्रे वेगाने फिरवत या प्रकरणात शनिवारी (१९ एप्रिल) आणखी तिघांना अटक केली. यामध्ये परंडा येथील वसीम इसाक बेग आणि जावेद नवाबमुद्दीन मुजावर तसेच बार्शी येथील जमीर अन्सार पटेल यांचा समावेश आहे. या अटकेमुळे ड्रग्ज रॅकेटमध्ये सहभागी असलेल्या आणखी काही जणांची नावे समोर येण्याची शक्यता आहे.

आधीची कारवाई आणि जप्त मुद्देमाल:

यापूर्वी गुरुवार, १७ एप्रिल २०२५ रोजी रात्री उशिरा, बार्शी पोलिसांनी परंडा रोड परिसरात सापळा रचून असद हसन देहलुज (वय ३७, रा. परांडा), मेहफुज महंमद शेख (वय १९, रा. बावची, ता. परांडा) आणि सरफराज उर्फ गोल्डी अस्लम शेख (वय ३२, रा. बार्शी) यांना अटक केली होती. त्यांच्याकडून पोलिसांनी एकूण १३,०२,४०० रुपये किमतीचा मुद्देमाल जप्त केला होता, ज्यामध्ये:

• १० लाख रुपयांची टोयोटा कोरोला कार (MH 12 HN 7437)
• एकूण २०.०४ ग्रॅम मेफेड्रोन (एमडी) ड्रग्ज (किंमत १,५०,४०० रु.)
• एक गावठी पिस्तूल (किंमत ६०,००० रु.)
• ३ जिवंत काडतुसे (किंमत ३,००० रु.)
• तीन मोबाईल फोन, रोख रक्कम आणि इलेक्ट्रॉनिक वजनकाटा यांचा समावेश होता.

कायदेशीर कारवाई आणि तपास:

या सर्व आरोपींविरुद्ध बार्शी शहर पोलीस ठाण्यात गुन्हा रजिस्टर क्रमांक ३५३/२०२५ अन्वये एन.डी.पी.एस. ऍक्ट कलम ८(क), २२(ब), २९, भारतीय शस्त्र अधिनियम कलम ३, २५ आणि महाराष्ट्र पोलीस कायदा कलम १३५ नुसार गुन्हा दाखल आहे. जिल्हाधिकाऱ्यांच्या शस्त्रबंदी आदेशाचे उल्लंघन केल्याचा ठपकाही त्यांच्यावर आहे.

या सलग कारवायांमुळे बार्शी आणि परंडा परिसरात मोठी खळबळ उडाली आहे. अमली पदार्थांच्या तस्करीचे हे मोठे जाळे उघडकीस येत असून, यात आणखी काही मोठे मासे गळाला लागण्याची शक्यता पोलिसांनी वर्तवली आहे. पोलीस निरीक्षक बालाजी कुकडे यांच्या मार्गदर्शनाखाली तपास अत्यंत वेगाने आणि बारकाईने सुरू आहे.