परंडा नगर परिषदेच्या निवडणुकीच्या धामधुमीत राजकीय वातावरण आज चांगलेच तापल्याचे पाहायला मिळाले. नामनिर्देशन अर्जावरील आक्षेपाच्या कारणावरून मंत्री तानाजी सावंत आणि माजी आमदार राहुल मोटे यांचे गट आमनेसामने आले. यावेळी दोन्ही गटांच्या कार्यकर्त्यांमध्ये जोरदार वादावादी होऊन त्याचे रूपांतर दगडफेकीत झाले.
याबाबत मिळालेल्या प्राथमिक माहितीनुसार, परंडा नगरपरिषदेत निवडणूक प्रक्रियेदरम्यान अर्जांची छाननी सुरू असताना हा प्रकार घडला. शिवसेना शिंदे गट आणि सर्वपक्षीय स्थानिक विकास आघाडीचे कार्यकर्ते परस्परांना भिडले. तानाजी सावंत गटाचे उमेदवार झाकीर सौदागर आणि माजी आमदार राहुल मोटे यांच्या गटाचे उमेदवार विश्वजित पाटील यांच्यात सुरुवातीला अर्जावर आक्षेप घेण्यावरून शाब्दिक चकमक झाली.
या वादाचे पर्यावसान लवकरच मोठ्या गोंधळात झाले. दोन्ही बाजूंचे कार्यकर्ते आक्रमक झाल्याने परिस्थिती चिघळली आणि दोन्ही गटांकडून दगडफेक करण्यात आली. या घटनेमुळे परंडा नगरपरिषद परिसरात काही काळ तणावाचे वातावरण निर्माण झाले होते. राजकीय वैमनस्यातून घडलेल्या या प्रकारामुळे शहरात खळबळ उडाली आहे.
ठळक घडामोडी:
-
निवडणूक अर्जावर आक्षेप घेतल्याने वादाला सुरुवात.
-
तानाजी सावंत आणि राहुल मोटे यांचे समर्थक आमनेसामने.
-
उमेदवार झाकीर सौदागर आणि विश्वजित पाटील यांच्यात वादावादी.
-
शाब्दिक चकमकीनंतर दगडफेक, परिसरात तणाव.
