परंडा : कत्तलीच्या उद्देशाने चारा-पाण्याची कोणतीही व्यवस्था न करता अत्यंत क्रूरपणे १४ जर्सी गायींची बेकायदेशीर वाहतूक करणारा आयशर ट्रक परंडा पोलिसांनी पकडला. वांगी बु. (ता. परंडा) नजीकच्या पेट्रोल पंपाजवळ ही कारवाई करण्यात आली असून, पोलिसांनी जनावरे आणि वाहनासह तब्बल ११ लाख २० हजार रुपयांचा मुद्देमाल जप्त केला आहे. याप्रकरणी दोघांवर गुन्हा दाखल करण्यात आला आहे.
साजीद अब्दुल रहीम कासार (वय ३६, रा. वाढवना बु., ता. उदगीर, जि. लातूर) आणि आरुआत फारुक कुरेशी (रा. अकलूज, ता. माळशिरस, जि. सोलापूर) अशी गुन्हा दाखल झालेल्या संशयित आरोपींची नावे आहेत.
पोलिसांकडून मिळालेल्या माहितीनुसार, मंगळवारी (ता. २८) मध्यरात्री सव्वा बारा वाजण्याच्या (००.१५ वा.) सुमारास वारदवाडी ते भूम जाणाऱ्या रस्त्यावरील वांगी बु. येथील नायरा पेट्रोल पंपाजवळ पोलिसांनी संशयावरून एक आयशर ट्रक (MH 25 B 9190) अडवला. या वाहनाची तपासणी केली असता, त्यात १४ जर्सी जातीच्या गायी अत्यंत दाटीवाटीने व क्रूरपणे भरलेल्या अवस्थेत आढळून आल्या. या जनावरांसाठी चारा-पाण्याची कोणतीही सोय केलेली नव्हती आणि त्यांची कत्तलीसाठी निर्दयीपणे वाहतूक केली जात असल्याचे उघडकीस आले.
या कारवाईत पोलिसांनी ४ लाख २० हजार रुपये किमतीच्या १४ जर्सी गायी आणि वाहन असा एकूण ११ लाख २० हजार रुपयांचा मुद्देमाल जप्त केला आहे. याप्रकरणी परंडा पोलिसांनी सरकारच्या वतीने फिर्याद दिली असून, आरोपींविरुद्ध प्राण्यांना क्रूरतेने वागविण्यास प्रतिबंध अधिनियमाचे कलम ११(१)(ए), ११(१)(एफ), ११(१)(एच), ११(१)(आय) सह महाराष्ट्र प्राणी संरक्षण अधिनियमाचे कलम ५(अ), ५(बी), ९(ब), ११ आणि परिवहन नियम ४७, ५४, ५६ अन्वये परंडा पोलीस ठाण्यात गुन्हा नोंदवण्यात आला आहे. पुढील तपास पोलीस करत आहेत.
