बेंबळी : तुळजापूर-लातूर महामार्गावरील आरणी पाटीजवळ एका तरुणाला व त्याच्या मित्राला रस्त्यात अडवून लाथाबुक्क्यांनी बेदम मारहाण करत लुटल्याची धक्कादायक घटना घडली आहे. बळजबरीने दोन तोळ्यांची सोन्याची अंगठी आणि रोख रक्कम हिसकावून घेतल्याप्रकरणी तीन जणांवर बेंबळी पोलीस ठाण्यात गुन्हा दाखल करण्यात आला आहे.
आदित्य शाम शिंदे (वय २३, रा. एल.आय.सी. कॉलनी, लातूर) असे लुटण्यात आलेल्या तरुणाचे नाव आहे.
पोलिसांनी दिलेल्या माहितीनुसार, फिर्यादी आदित्य शिंदे हे आपल्या एका मित्रासोबत तुळजापूरहून लातूरच्या दिशेने जात होते. दरम्यान, ते आरणी पाटीजवळ आले असता आरोपींनी त्यांना वाटेत अडवले. यानंतर आरोपींनी आदित्य व त्यांच्या मित्राला शिवीगाळ करत लाथाबुक्क्यांनी मारहाण करण्यास सुरुवात केली. याच झटापटीत आरोपींनी जबरदस्तीने आदित्य यांच्या हातातील दोन तोळ्यांची सोन्याची अंगठी आणि खिशातील १,००० रुपयांची रोकड हिसकावून घेतली व तेथून पोबारा केला.
याप्रकरणी आदित्य शिंदे यांनी मंगळवारी (ता. २८) बेंबळी पोलीस ठाण्यात धाव घेत तक्रार दिली. त्यांच्या प्रथम खबरीवरून आरोपी तौशीफ बशीर बागवान, चेतन गजेंद्र आदटराव आणि अतिश बाळू लोहार (सर्व रा. करजखेडा, ता. जि. धाराशिव) या तिघांविरुद्ध भारतीय न्याय संहितेच्या (BNS) कलम ३०९(४), ११५(२), ३५२ आणि ३(५) अन्वये गुन्हा नोंदवण्यात आला आहे. बेंबळी पोलीस या प्रकरणाचा अधिक तपास करत आहेत.
घरात वृद्ध महिला झोपेत असताना चोरी; रोकड व दागिन्यांसह ७७ हजारांचा ऐवज लंपास
ढोकी : घरात एकटीच महिला झोपली असल्याची संधी साधून अज्ञात चोरट्याने कपाटातील रोख रक्कम व सोन्या-चांदीच्या दागिन्यांसह एकूण ७७ हजार रुपयांचा ऐवज लांबवल्याची घटना धाराशिव तालुक्यातील गोपाळवाडी येथे घडली आहे. याप्रकरणी ढोकी पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे.
याबाबत पोलिसांनी दिलेली अधिक माहिती अशी की, गोपाळवाडी (ता. जि. धाराशिव) येथील फिर्यादी हनुमंत धोंडीराम मोटे (वय ५३) यांची आई घरात एकटीच होती. त्या घराचा दरवाजा केवळ पुढे ओढून (लोटून) झोपल्या होत्या. याच परिस्थितीचा फायदा घेत अज्ञात चोरट्याने घरात प्रवेश केला. यानंतर चोरट्याने घरातील कपाटात उचकापाचक करून त्यातील ८ ग्रॅम वजनाचे सोन्याचे दागिने, चांदीचे दागिने आणि ३० हजार रुपयांची रोख रक्कम असा एकूण ७७ हजार रुपये किमतीचा मुद्देमाल चोरून नेला.
सकाळी चोरीचा हा प्रकार लक्षात आल्यानंतर परिसरात खळबळ उडाली. यानंतर फिर्यादी हनुमंत मोटे यांनी मंगळवारी (ता. २८) ढोकी पोलीस ठाण्यात धाव घेत तक्रार दिली. त्यांनी दिलेल्या प्रथम खबरीवरून अज्ञात व्यक्तीविरुद्ध भारतीय न्याय संहितेच्या (BNS) कलम ३०५ (अ) अन्वये गुन्हा नोंदवण्यात आला आहे. या घटनेचा पुढील तपास ढोकी पोलीस करत आहेत.
